إجا الصيف، وينكن يا فنانين؟ بقلم جوزفين حبشي

بقلم جوزفين حبشي

“إجا الصيف، وينِك يا روزين، إجا الصيف ،واجتمعوا الحلوين، وانا محتار، شو بدي قلّن، سألوني كلّن، وينا روزين”… اليوم الصبح،؟سمعت هالغنية القديمة والحلوة لمحمد جمال على الراديو، انا وعم بشرب قهوتي على البلكون بهالشمسات، وعم بتفرج على صور مجموعة اصدقاء على فيسبوك، عم بيقضوا عطل الصيف على شواطئ تركيا واليونان وشرم الشيخ وغيرها … صرت رندح هالغنية على طريقتي الخاصة، يعني: إجا صيف، وينكن يا فنانين، إجا الصيف. وإذ، بشوف صور اصدقائي ، مجموعة فنانين واعلاميين ومؤسسين مهرجانات فنية، على متن باخرة سياحية. النجمة السي فرنيني وابنها النجم يورغو شلهوب، الكاتبة منى طايع، نجميّ جوائز موركس دور الاخوين الدكتورين فادي وزاهي حلو مع عيلتن، الاعلامية وفاء شدياق، وكلن منطلقين صوب الاستمتاع والترفيه على الشواطئ اليونانية . وهيك، عرفنا وينن، بس متل الصيف اللي إجا، إجا عبالي اعرف، وعرّفكن معي، وين ممكن يكونوا غير نجوم عم يمضّوا عطلتهم هالصيف؟
انا متل ما بتعرفوا، بحب السينما، بس اذا قصدنا صالات السينما لنشوف نجومنا المفضلين خلال الموسم الصيفي، ممكن نطلع بسلة فاضية، لأنو النجوم متلنا كلنا، بيفضلوا السياحة والسفر والاسترخاء والانطلاق صوب الشمس والبحر والرمال الذهبية خلال العطلة الصيفية. لهيك تحولت محسوبتكم “٠٠٧” وبلشت اتحرّى وبحبش ونبّش وين ” غاطسين” الستارز.
أول المشاهير، بنت البلد المحامية امل علم الدين، اللي انا زعلانة منها كتيييير. انو معقول ما خطر على بالها بعد تجي تصيّف على شطوطنا اللبنانية ” اللازوردية” ؟؟؟؟ شطوط الشمال متل البلور و”بتهبل” ، والشطوط من الجيّة لصور “بتسطّل” يا امولا، انو ليش ما عم بتطّلي يا بنت البلد ليش؟؟؟؟ عن جد انا آخد على خاطري منك، انو بلا مواخذة ” مين ماااااخدة”؟؟؟؟ امل وصهرنا العزيز جورج كلوني، “اخدين” فيلا “بتهبل”، سعرها ٢٠ مليون دولار على ضفاف بحيرة كوم الايطالية الساحرة بطبيعتها الخلابة وهواها النقي والمناسب تماما لولادن التوم… عن جد تبقوا طلّوا ، نحنا عنا بحيرة القرعون اذا هالقد بتحبوا البحيرات…
النجمتين الهوليوديتين جنيفر أنيستون وجسيكا ألبا بيعشقوا البرونزاج، والعطلة الصيفية بالنسبة إلهم بتعني بحر وشمس وزيت تسمير وعوينات من اشهر الماركات. مكانن المفضل هو مدينة كابو سان لوكاس بالمكسيك، فاذا عبالكن تعملولن surprise, صدقوني رح تستمتعوا بشوفتن وبشوفة هالمدينة اللي كانت تعتبر مجرد بلدة صيد ساحلية هادية على طرف ولاية «باجا كاليفورنيا» المكسيكية المطلة على بحر كورتيز، بس تحوّلت بالسنوات الأخيرة مقصد آلاف السياح كوحدة من أجمل بقاع الأرض وأغناها بالمناظر الطبيعية الساحرة.
أما بريتني سبيرز اللي بتعشق متلن البرونزاج، فهي بتفضل تقضي عطلتها بهاواي، و سيلينا غوميز “هشلانة” مع فرانديتا بكابري ، وإيفا لونغوريا بتتنقل طول الصيفية بين شواطئ فلوريدا وإسبانيا والبرازيل.
ريهانا وبيونسي وألتون جون وأورلاندو بلووم وسيلفستر ستالون وبونو وهيو جاكمان وناوومي كمبل، بيحبوا اليخوت وبيقضوها ” حزّك مزّك” بالبحر كل الصيف. عيلة بيكهام (دايفيد وفيكتوريا والاولاد) والممثل زاك أفرون، فينا نحطّن بخانة عشاق المغامرات واكتشاف أماكن جديدة، ومن النادر انو يكرروا مكان عطلتهم، فزاك افرون مثلا قطع صحراء دبي وتسلق جبال البيرو، وعيلة بيكهام ما تركت بلد جديد «يعتب عليها»، من تانزانيا للملديف واليونان.
ال ” بريتي وومان” جوليا روبرتس بتحب تبعد عن الأماكن التقليدية خلال العطل، وهي كانت زارت كرواتيا صيف ٢٠١٧ مع زوجها وأولادها ال٣، يعني قبل ما تصير كرواتيا وصيفة بطل العالم بكرة القدم، ومقصد العالم بصيف ٢٠١٨.
اما ختامها مسك مع نجم فيلم «تيتانيك» ليوناردو دي كابريو اللي ما هيئتو “تعقّد” من السفن ابدا ، لأنو غرقان بحب البحر ومهووس باليخوت . ليو بيعشق يمضّي عطلته الصيفية عم يكزدر على متن يخته الضخم اللي ما ترك مرفأ يعتب عليه، متل الجزر اليونانية وإيبيزا وبورا بورا والبرازيل ومدينة كان الفرنسية بشواطئها الخرافية. وعلى متن يختو، بينظم ليو بشكل دائم حفلات صاخبة بتضم أصدقاءو وعدد كبير من عارضات الأزياء اللي بيعتبرن نقطة ضعفه الثانية بعد اليخوت.
امانة يا ليو، اذا قطعت على الجزر اليونانية من هلأ لاسبوع، ولمحت اصحابي، سلملي كتير على السي ويورغو ومنى ووفاء وزاهي وفادي، وبوّسلي ياهن?.