فن ومشاهير
الو ثريا، زياد فلّ اليوم. ما تسأليني بالنسبة لبكرا شو؟؟؟؟
جوزيفين حبشي
ألو ثريا؟؟؟ انا زكريا . وينك؟؟؟؟ ما حدا خبرك إنو العبقري راح؟ ايه، راح، وهيدي للاسف… معلومات اكيدة.
نزل السرور وقهوة المعلم نخلة سكّروا اليوم، وينك يا ثريا؟ ما حدا خبرك أنو ضحكتنا و غصّتنا وفلسفة حياتنا، وسخريتنا اللاذعة وحقيقتنا الصادمة وفشة خلقنا المهضومة، خلص، خلصت؟ وينك يا ثريا؟؟؟؟ كيف يعني مش فاضية؟ بشو مشغولة هلأ؟ وصل الصهاريج ليعبيلك الخزان؟ ولِك شو قصته هالخزان؟ ما بقى تخلي حدا يلعب فيه لهالخزان. يا ثريا ، يلا ناطرينك. اكيد بتلحقي توصلي ، انتي اطلعي مع ابنك (الذكي بس حمار) بالتاكسي، ورشيد ونجيب وعزّو والمعلم نخلة بيلحقوكي بالبيك اب.
وين بدك تتركي ابنك الذكي بس حمار؟؟؟؟ جيبيه معك. شو؟ بيضيق خلقو للصبي، من هالجو العصبي؟ ايه طيب، صار قد الجحش، حطيلو فيلم اميركي طويل على نتفليكس وشرّفي تعي.
بشرفك روّجي اذا بدّك تودعيه، هلأ الهدوء نسبي ، بس بعد شوي لا العقل زينة ولا بلوط، لأنو الناس، كل الناس رح يفقدوا عقلن لمّا يحسوا فجأة انهم خسروا الامل والضحكة والفلسفة والسخرية والذكريات والفرح والوجع والحقيقة واللحن والكلمة اللي ما بتشبه كل شي انقال وممكن ينقال.
يا ثريا روّجي شوي، لازم تسندي فيروز . فيروز اليوم هي الام الحزينة وما من يواسيها. ولك الله يساعد فيروز ، سألوها الناس عنه سألوها، قالتلن مش راجع اوعى تلوموني. قالتلن بالدّفاتر عندا أسامي غيّاب، أصحابا تركوها، صارت بلا صحاب، يوسف الكندرجي، صبحي بيّاع الكاز، وأمين البوّاب اللّي انقتل عَ الباب، وليال وعاصي ومنصور والياس، أساميهن عندا وهنّي راحوا وكل اللّي راحوا راحوا… فيروز حده، عم تمسح جبينه وعم بتقلّه” لا ما تفل ، ما تفل” و “عيونك مش فجأة بينتسوا، وضحكات عيونك ثابتين ما بينقصوا”. فجأة بتغص وبيختنق صوتا لمّا تذكرت انو كتّروا فوق : عاصي وليال وزياد. انجأ قدرت همستله: سلملي عليهن وقلّن اني بسلّم عليهن، وبوسّلي عينيهن، وقلّن اني ببوّس عينيهن.
يلا يا ثريّا روّجي ، وما تسأليني “بالنسبة لبكرا شو“؟ دفن وطني؟ نيشان؟ وسام؟ تسكير عام؟ حداد وطني؟ يعني بصراحة مش مهم ، صحيح الصراحة بتجرح لكنها بتفيد، وزياد مش ناطر من حدا تكريم. اذكري يا ثريا بس شو كان منيح. اذكري بس شو كان عبقري، فظيع، مبدع ،مهضوم، سابق عصره، صريح.
اذكري، اذكري، اذكري بس. اذكري، اذكري، اذكري بس
اذكري، اذكري، اذكري بس. اذكري، اذكري، اذكري بس
اذكري، اذكري، اذكري