اليسا… إنتي الحب!!!

جوزيفين حبشي

في كتير  كتير كتير أصوات حلوة وقوية ومهمة  وملهمة على مرّ التاريخ وبالعالم كله. في أيقونات مكرّسة، وفي عظماء ، وفي أساطير ، وفي  فيروز  وفي أم كلثوم  وفي اديث بياف وفي ويتني هيوستن  وفي اديل وفي سيلين ديون  وفي وفي وفي… بس، دايما بيبقى في هونيك صوت محدد، صوت مدري كيف بيغلغل بروحكن متل نسمة صيفية، مدري كيف بيغمركن وبيدفّيكن بعز بردكن وحزنكن ووحدتكن، مدري كيف بيداويكن من وجعكن، بيرسم بسمة بقلبكن، بيطلّع تنهيدة من اعماق اعماق روحكن، بيعطيكن إحساس إنكن شاربين كاس نبيد قدام موقدة ولعانة ، والتلج نازل متل النفناف عم بيلامس بحنان الشجر والارض والمقاعد المنسية على الطرقات. صوت بيحسسكن انو  بوسة من حبيبكن ودعم من صديقكن وغمرة من أمكن وبيّكن وابنكن، صوت بيخلّيكن تشوفوا الشمس شارقة حتى لو في غيوم سود ، وإنو الدنيي حلوة، رغم كل شي حلوة وبتستحق تنعاش لاسباب كتيرة، واحلاها هيدا الصوت بالتحديد… اليسا، إنتي هيدا الصوت بالتحديد، لِ بيعنيلي اللي انا بالتحديد ولملايين غيري بالتأكيد. اليسا، إنتي الإحساس اللي بحسّو  أو عبالي حسّو ، إنتي الفرح اللي عبالي يغمرني ويشد، إنتي الأمل اللي بتمنى آمن فيه، إنتي الشغف اللي مستحلاية عيشو  مرة وتنين والف ومليون مرة، إنتي القوة اللي عبالي إتحلّى فيها لما تكتر من حولي الهموم. اليسا ، بالنسبة إلي ولغيري كتار ، إنتي الحب كله والحلا كله بكل ما بتحمل هالكلمة من معاني. بحبك.