سنة حلوة متلك، ماريلين نعمان

جوزيفين حبشي

وبيسألوا هي مين، للكل فيها مهتمين؟ رح قلّكن هي مين. هي موهبة إستثنائية، منحسّا قريبة كتيرة، منحسّا ما بتشبه غيرا من الفنانين، لأ ما بتشبهن. هي متل الغيمة بتشتي نعومة وصدق واحساس، ومتل الهمسة بتغلغل باسلوبا الطبيعي والعفوي بقلوب كل الناس.

Screenshot

هي مين؟ هي عم بتقصّر بُعد الأجيال ، لأن جمهورها مش بس المراهقين والشباب، وكشاهدة عيان، انا لاحظت بحفلاتها ، جمهور ناضج ومن العمر التالت، متواجد وحافظ كل اغانيها المختلفة عن صف الحكي والموسيقى التقليدية.

Screenshot

هي مين؟ هي ما بتخاف تكون حالا متل ما هي، وما بتحطّ مسافة بينها وبين جمهورها. هي صعبة كتير، لا بل مستحيل  تتنكّر  بوج  ما بيشبها ، وصدقها وحقيقيتها بيوصلوا دغري لكل الناس.

هي عم بتحقّق اللي بيخطر بالبال بكتير حرفية وابداع  ومسؤولية. هي عم بتطنّش عحكم الأشكال، عم تعمّل الصح من وجهة نظرها ونظر فريق عملها الحاضر  دايما معها  وحدّا واللي بيشبها متل شي فولة انقسمت  نصّين .

Screenshot

هي عندا موهبة بتضل تزنّ ع ديّنتها وبتقلا “إنسي العالم إنسي تْفلّي، من كل قلبك غنِّي وعلّي ، بركي نغطّي عالنّشاز”. ولهيك ، كلّ ما تغنّي، نحنا عم نحبا اكتر، وكل ما تمثّل ، نحنا عم نعشقا اكتر، وكل ما نحبا، عم نفتخر بحالنا اكتر واكتر، لأن صوتا عم ينقذنا من الانجراف  بعالم طاغي فيه النشاز، ولأن موهبة صافية متلا، صادقة متلا، حلوة وطبيعية متلا، صارت عن جد عن جد انجاز…

Screenshot

اليوم ٩ حزيران/ يونيو، عيد ميلاد الفنانة الحقيقية ماريلين نعمان  اللي  منتمنالا الاستمرارية بمشوار مبلّش صح، ورح يكفي صح، لأن المكتوب بينقرا من العنوان.

بعيدك يا ” بون بونة”، منتمنالك مستقبل بيشبهك، ومنقلك إنسي العالم  السلبي، واوعا اوعا تفلّي، ومن كل قلبك غنِّي وعلِّي، طيري وانجحي وحققي احلامك واحلامنا بفن راقي وحلو وبسيط متلك ،بركي ، بركي، بركي نغطّي عالنّشاز.  العمر الحلو لأحلى ماريلين.

Screenshot