مبروك يا عروس

جوزفين حبشي:

يا حضرة العروس المبروزة على سطح سيارة كشف، وعم بتحيي الجماهير الواقفة عالبلاكين، بحركة بتشبه تحية “ميس يونيفرس” لحظة انتخابا والدمعة بعينا تأثرا وفرحا وعدم تصديق، بشرفك بشرفك شو بتكوني عم بتحسي بهاللحظة؟؟؟؟
انو بتحسي حالك عن جد ملكة عصرك لأن صار عندك مملكتك الزوجية، هال ٨٠ متر ، المطل على باركينغ البناية وحيط الدكانة ، مع بالكون انجأ فيكي تشربي عليه قهوة انت وامير الاحلام؟
او انو بتكوني فخورة وعلى عينك يا تاجر ، عم بتوزكي لبنت الجيران العانس ، و” بص شوف العروس بتعمل ايه” ، عم تستعرض قدام الكل عضلاتا اللي شدوا العريس المعتر ومفاتنا اللي غرروا فيه وخلوه يتورط ويتدبّس بزواج العمر؟
شو بتحسي انت ومعمشقة على سطح السيارة يا عروس، على وجّك كيلو بويا، والهوا والغبرة عمبيسفقوا على حمرتك، ورموشك التركيب بلشوا يهزهزوا ويتطايروا مع الريح؟
بتلوحي لناس ما بتعرفيهم ولا هني بيعرفوكي، هني مبسوطين بمنظرك اللي اجاهم شحمة عفطيرة ، وانت مبسوطة بحالك وانجازك التاريخي. ولك الف مبروك يا عروس بس بليز ما تحيي بايديكي التنين، احلى ما تشنكحي من سطح السيارة وتجي كادشة الارض وتكسري حلمك الاستعراضي الجميل قدام ناس عم يكسروا بمشهدك ،رتابة بعد ضهر يوم احد كئيب.
انشالله بتتهني عروس?

ملاحظة: انا بيتي انجأ ١٠٠ متر، والبلكون انجأ فيني اوقف عليه تا دندل السلة للدكنجي تا يحطلي علبة رب البندورة للطبخة.
يعني مش الهدف ابدا السخرية من الطبقة المتوسطة اللي انا بنتمي الها، الهدف بسمة على عالمشهد الكاريكاتوري.