نحنا اذا طلعنا من البيت، ما منعرف اذا رح نرجع

_ جوزفين حبشي _

نحنا مش مناح.
ولا مرة كنا مناح
نحنا اذا طلعنا من البيت، ما منعرف اذا رح نرجع،
واذا بقينا بالبيت، ما منعرف اذا رح نبقى نحنا، واذا هو رح يبقى.
نحنا مش مناح.
نحنا كنّا نوعى على صوت فيروز، صرنا نوعى على صوت الMK عم بتعن وتعن وتعن وتعن، وصرنا ننام على صوت الغارات، هيدا اذا عرفنا ننّام.
نحنا مش مناح.
نحنا كنّا نحلم…صرنا نكوّبس.
كنّا نخطّط لبكرا…هلق منخاف من شو مخبالنا بكرا.
نحنا عشنا حياتنا كلها بين ملجأ وملجأ، وبين كل نزلة وطلعة من الملجأ، وكل عروس جبنة بيكون وساندويش مالينغ، كان في مدرسة وجامعة وشغل وسهرة وضهرة وعلاقة حب وزواج وولاد وموت واستشهاد وهجرة وزعل ودموع.
نحنا عشنا عمرنا كله عم نمشي بين النقط: بين صاروخ وقذيفة، بين راجمة و انفجار ، بين رصاصة طايشة ورصاصة قنّاص.
عشنا عمرنا كله بين حرب فلسطينية وحرب سورية وحرب اسرائيلية وحرب ايرانية ، وبين انتفاضة و٧ ايار وثورة وفساد وانهيار ودمار .
نحنا مش مناح.
نحنا ما بحياتنا كنّا مناح .
ويمكن كل هالعمر..كل هالتعب.. كل هالركض كان بس كرمال حلم صغير : إنه شي مرّة وحدة بهالعمر ، وقبل ما يخلص العمر، نحسّ إنو نحنا مناح.
نحنا مش مناح. مش مناح… يا ريت بتسمحولنا نحلم نصير مناح.