‎الله يرحمك يا نيل امسترونغ بقلم جوزفين حبشي

‎

بقلم جوزفين حبشي

متل امبارح ، وتحديدا ب ٢٥ ‎آب ٢٠١٢، رائد الفضاء نيل امسترونغ عطانا عمرو وأخد منا الحلم وسحر اسطورة القمر البعيد والحلو.
‎معقول يعني نيل امسترونغ؟ شو استفاد يعني من رحلتو عالقمر؟ وهلأ من بعد ما عطانا عمرو ، شو بينفعو ينقال انو هو “اول انسان وطئت قدمه سطح القمر وكزدر على مصدر الهامنا”؟؟؟ بدكن تقولولي خدم البشرية والعلم؟؟؟ بس كان ممكن ينزع الادب والشعر والفن والحلم والرومنسية والخيال.

‎الحمدالله، الله ستر ، وما حدا قبضو جد، وإلا كان ممكن بسبب هالنزلة على القمر ، نزار قباني يبطّل يقول مثلا: الحب يا حبيبتي قصيدة جميلة مكتوبة على القمر ، وفيروز كان ممكن تحرد وتغيّر سكنها وما تعود هي والقمر جيران، وسيناترا كان ممكن يلغي رحلتو على القمر وما يتحفنا برائعتو fly me to the moon
‎كمان عمرو دياب كان ممكن ما يكون عندو ” قمرين” واحمد دوغان كان ممكن ما يفرفحلنا قلبنا باغنية” قمر لكل الناس وقمر ليّا انا”.
‎وحدا محطة ال ام تي في، يا ريتا انتبهت على انجاز امسترونغ وما تعذبت وقدمتلنا الكسوف الفني بعالم الدراما التلفزيونية” متل القمر”….
‎عن جد الله ستر، وما حدا قلل عقلو على العلم ولا على ابولو واجر نيل اللي ” وطئت” سطح القمر وكسرتلنا الصورة الحلم.