رسالة ( بالمصري) الى فاتن حمامة في عيد ميلادها

جوزيفين حبشي

‎ هابي بيرثداي فتّونا، هابي بيرثداي
‎فتّونا. زي النهاردة ، في ٢٧ مايو ١٩٣١، اتولدت سيدة الشاشة العربية فاتن حمامة.
‎اعذرينا يا فاتن، مش هنغنيلك السنة دي” انزل يا جميل عالساحة واتمخطر
‎كدا بالراحة “، علشان من الاحسن انك تبقي فوق. هنا الوضع مش ولا بدّ. وكمان اعذرينا ما فيش تورتة، إحنا في ورطة ما يدراش بيها غير ربّنا.
الدنيا قايمة قاعدة ومقلوبة عالآخر يا فاتن، وما حدّش فاضي يفتكر عيدك. حصل ايه؟؟؟ دا حصل وحصل وحصل. لأ لأ يا حببتشي ،حوار شيرين عبد الوهاب وحسام حبيب خلاااص انتهى وبقى من الماضي ، والنهاردة في حاجات انقح ، وخدي عندك: مش بوسي شلبي ما طلعتش مرات محمود عبد العزيز ، ولا حتى ارملته، وعياله رافعين عليها دعوى؟ آه واللهي زي ما بقولِك كده. ومش احمد السقا طلّق مراته ونازل يكتب ويمحي على السوشل ميديا، وقال ايه؟ ، بيقول ان دي اخته اللي كتيت مش هوا. ان جيتي للحق يا فاتن، احمد اتصرّف تصرّف مش كبير مع مها الصغير. عيب دي أم عياله. ايه؟ لأ يا حببتشي، مها ما ضربتوش بالألم، دي بريغيت مرات ماكرون هي اللي عملت كدا وبقيت فضيحتهم بجلاجل. على فكرة يا فاتن، اخبار حليم والسندريلا سعاد حسني ايه؟ همّا كويّسين؟ طب عال يا حببتشي، واصحي يا فتّونا تنزلي معاهم عالساحة ، علشان مش حتتمخطروا كده بالراحة. الدنيا هنا مقلوبة عليهم همّا الاتنين برضو. قال ايه يا ستي، اهل العندليب نشروا رسالة كدا متقطّعة ومتوصّلة، وبيقولوا انها دليل قاطع على إن حليم ما تجوزشي سعاد . وبيقولوا ان سعاد هي اللي بعتاها لحليم من ييجي كده ٥٠ او ٦٠ سنة ، وبتقلّه فيها “عندليب اسمر يا عندليب اسمراني مين قساك عليي”؟ و” ارحم دموعي” و” ما تسبنيش” و”بحلم بيك انا بحلم بيك”… والنبي يا فاتن، اسألي حليم والسندريلا هما اتجوزوا فعلا ولا لأ؟ ويا ريت برضو تسألي محمود عبد العزيز إن كان ردّ بوسي بعد ما طلقها ولا لأ؟
طيب يا حببتشي، اشوف وِشِك بخير، ووعد، السنة الجايّة حنحتفل بعيدك ، وهنغنيلك” انزل يا جميل عالساحة”، لكن بلاش السنة دي. احتفلي السنة دي فوق، وخلّي ابو مجد يغنيلك” حمامة بيضا يا حمااااامة”.