ماراتون بيروت… الركض المجاني ما بيحقق احلام زياد

جوزيفين حبشي

بصراحة، لأنو ما في احلى من الصراحة، ما كتير فهمت الغاية من ورا  دعوة ماراتون بيروت ( اللي كانت مقررة بعد بكرا السبت، والهيئة تأجلت) للركض أو المشي ٧ كلم بالمدينة الأحب على قلب زياد الرحباني. وما فهمت ولا حبّيت التركيز على انو  الدعوة  مجانية وحتّضل مجانية و ” بلا ولا شي”؟ إنو المقصود ما في متاجرة او  منفعة مادية من هالمبادرة؟ وانو  ما في قطف للحظة؟ وبس عبالكن تكزدروا وتكزدرونا معكن بشوارع  مدينة  كان  يمشيها ويعشقها زياد؟ وانو wow شو مؤثرة ورومنسية هالمبادرة؟

بصراحة، لأنو ما في احلى من الصراحة؟ ما عم شكك ابدا بنواياكم، واكيد عندي ثقة بمحبتكن لزياد، بس يا ريتكن عملتوا هالمبادرة عبكير، وقت زياد كان بعدو موجود وقادر يمشي معكن كرمال قصص مش مجانية ابدا. يا ريت هالدعوة ما كانت  “بلا  ولا  شي”. اكيد مش رح قول يا ريت كانت بهدف جمع تكاليف علاج زياد، لأنو زياد لا كان عايز حدا  ولا كان اصلا بدّو يتعالج. يا ريت هالمبادرة كانت ابكر من هيك، وكرمال شي، حيالا شي، مهم لزياد. يمكن دعم لتسجيل  مقطوعة موسيقية، لفتح مسرح صغير، او  لدفع اقساط تلاميذ بيحبوا الموسيقى ومش قادرين يتعلموا، أو .. بتعرفوا شو؟ مساهمة لعدم اقفال قهاوي وحانات وسناكات ومحلات كانت كتيييير تعنيله لزياد، واتسكّرت بالحمرا بسبب الاوضاع الاقتصادية، وسكّرت طاقة الامل ببكرا،  بالنسبة إلو.

تأجلت المبادرة؟؟؟؟ كتير منيح. بس يا ريت بتغيّروا منشوركن ورسالتكن من ” الدعوة كانت مجانية، وحتضل مجانية”، ل ” الدعوة مش مجانية، والهدف من ايراداتها واضح، حتى تقدر احلام زياد تمشي  وتركض وتتحقق، بفضل مساهمة  من الناس اللي حَبّن زياد وحبّوه”… شو؟؟؟ مع فائق الاحترام والتقدير، وشكراً.

Screenshot