انا بحب حالي… بقلم جوزفين حبشي

بقلم جوزفين حبشي

نعم، انا بحب حالي….واكتر شي بحبو بحالي ومبسوطة فيه قد الدني اني كتير “ديموديه” و ” اولد سكول” بكل شي تقريبا، ما عدا ” الفاشن” . شو بحب اني بحب فيروز وصباح وام كلثوم وعبد الحليم وكارم محمود ونصري شمس الدين وداليدا وخوليو وجو داسان وبيار باشليه، ليه؟؟؟ هيك، من غير ليه( حتى “من غير ليه” غنيّة لعبد الوهاب”).
شو بحب اني بحب الاغراء على طريقة صوفيا لورين وهند رستم ،والتمثيل على طريقة ميريل ستريب وسوزان ساراندون وفاتن حمامة وعليا نمري ورلى حمادة ورندة كعدي ( الليستا طويلة ، ما حدا يزعل).
شو بحب اني بحب كيف بتكتب احلام مستغانمي وكيف بيتغزل نزار قباني وكيف بيتهضمن يحيى جابر،
شو بحب اني بحب “الدني هيك” وابو سليم” و”عشرة عبيد زغار” و” الو حياتي” و ” المشوار الطويل” وعزيز السلمنكي وزمرد ووردة وبلبل افندي وكوكو وشويكار واسعد وفهمان، وهند ابي اللمع وعبد المجيد مجذوب، والسي فرنيني وجورج شلهوب، ونهى الخطيب سعادة وانطوان كرباج وايلي صنيفر، وانتبهوا، هول كلن بحبن من قبل ما قدّم ” ابيض اسود دهبي” على اذاعة لبنان( إنو حتى ما تقولوا عم بعمل دعاية لبرنامجي).
شو بحب انو احلى سهرة عندي كانت عالبلكون، عم قصقص بزر مع بنات الجيران ونغني لوردة وميادة الحناوي وفي يوم وليلة…
شو بحب انو قارية كتب بعدد شعر راسي( على فكرة شعري مش كتير عبي) وحاضرة افلام بصالات السينما بعدد شعر راسي وراسكن ، وقاعدي وجها لوجه مع اصحابي ، نشرب قهوة ونضحك من قلبنا ومش LOLLL
شو بحب اني ياما متنقلة بالباص والسرفيس واتو ستوب والتاكسي( لما تكون مسيسرة) ، لأنو اهضم واحلى chating بيكون مع شوفيرية السرفيس عادة.
شو بحب اني بحكي عربي وبكتب عربي وشايفة حالي بلغتي.
شو بحب اني متمسكة بمبادئي، وبقول اللي بدي ياه ” بالعربي المشبرح” حتى لو ما بيعجب الكتار .
شو بحب اني بحب من كل قلبي واللي بحبو بدافع عنو حتى لو غلطان … ايه حتى لو غلطان.
شو بحب انو اهلي من بعد الله، وشو بحب انو اهلي كتااااار، اهل واخوة واصدقاء واحباب. واكتر شي بحبو انو اصحابي ( الاصدقاء الفعليين مش الموسميين) بعدن اصحابي وبيبقوا اصحابي حتى لو ما منشوف بعضنا كتير. شو بحب انو بعد عندي اصحاب من ايام المدرسة (من صف ال 12eme A) ، ومعظم اصحاب الجامعة بعدن اصحابي، وفي منهن تلاتي اغلى من اخواتي(لينا وراشيل وديامان).
شو بحب انو ما بحب بيّض طناجر(حتى الجلي بالبيت ما بطيقو، بس بعترف انو بحب ركّب مقلة بعض الاشخاص اللي جسمن لبّيس ?).
شو بحب انو كرامتي اغلى شي عندي، شو بحب انو ما حدا ساعدني وعملت حالي بحالي، واكتر شي بحبو انو عندي حاسة سادسة ورادار بيكشف الاشخاص مقابيلي، مين صادق ومين لأ، مين بيحبني عن جد ومين لأ، يعني ما في داعي حدا يمثل عليي، بكمشو عالطاير. شو نسيتوا انو قضيت عمر بالنقد السينمائي، وبلقط عالطاير التمثيل، جيد كان او سيء؟
شو بحب اني فخورة باصلي وفصلي، بضيعتي، بأهلي، بشروال جدّي، بالمجدرة والبرغل على بندورة ، بايماني ( رغم اني مثقفة شوي وذكية كتير) بسيدة بشوات ومار شربل وقديسة رفقا، بلبنان اللي رح ضل اعشقو وشوفو احلى بلد رغم ابشع زعما دايرينو.
شو بحب اني ما خلقت هلأ بهالزمن الحالي ” لمْرِتّ” من كافة النواحي، شو بحب اني لحقت الزمن الحلو ، بالفن والثقافة والقيّم . صحيح خلقت بالحرب، بس عشت الحب الحقيقي والشغف المجنون والسلام مع حالي ، ويا ما استمتعت لما كان يبقى في قصف ومقطوعة الكهربا، بقصص بيّي المصرّ يلهينا ويخبرنا عن شقاوتو هو وزغير بالضيعة، كيف كان يسرق البيض من القن ، وكيف ياكل بطيخ بالليل ويوعد جدي انو ما يعمل pipi تحتو. شو بحب قديش كنت استمتع بقراية كتب عضوّ الشمعة، وباللعب بالشارع، ايكس وبيت بيوت ولقيطة.
شو بحب حالي متل ما انا، شو بحب انو مش ممكن اتغيّر لأنو ما عبالي اتغيّر.
اوووف شو بحب قصص بحالي. العمى شو طلعت نرجسية “نارسيسيك”