Newsme
حوار عاطفي- غنائي – مأساوي بين صديقتين
جوزفين حبشي
-ليه مدبرسي وزعلانة؟
-عايشي “شاغران دامور” بعيدن عنك ، وبعيد عنو حياتي عذاب
-إنو اذا زعلتي وانقهرتي وبكيتي ونتفتي شعرك ونزعتيCD “يا خاين ما لكش امان” قد ما رح تتسمعي عليه، ممكن يرجع يمشي الحال بينك وبينو؟
-ما بعتقد. خلص كل شي انتهى
- طيب طالما شكلو هو تغيّر من ناحيتك ، والوضع ما شكلو رح يتغيّر ، ليه ما بتتغيري انت؟
-كيف يعني؟
-يعني غيريلي مزاجك، وزتّي ورا ضهرك واقلبي الصفحة واضحكي وافرحي واصبغي شعرك اشقر( هيك الاوكسيجان بينتفو عنك) واتسمّعي على غنية سميرة سعيد “ما حصلش حاجة”
واووووو روعة هالغنية. صدقيني رح بتجني وتفحشي عالمزبوط انت وعم بترددي معها:
”وأديني سيبته وشفت اهو محصلش حاجة
والوضع فعلا مختلفش في أي حاجة
باكل واضحك بشتغل واعمل كل حاجة
لأ لأ مش زعلانة وكئيبة
مش ماسكة صورته وبتقهر زي العبيطة
ولا ماشية وبخبط دماغي في كل حيطة
بالعكس حتى انا حاسة مرتاحة وسعيدة
مطلعش انها حاجة وحشة اعيش وحيدة”…
-ايه سمعتا للغنية، بس سميرة بتقول بمقطع تاني: ” ما تمثليش انك عايشة طبيعي وعادية. ما تمثليش، انك سليمة”
-حبيبتي، اسمعي مني ومثلي . تخيلي حالك فاتن حمامة، ومثلي انو اخر همّك، وعيشي الدور للأخر.
-ولو؟؟؟ فاتن حمامة؟
- ايه معك حق، فاتن رومنسية ومغلوب على امرا. بدنا ممثلة مفحّلة ومتل إجرا ، وإيدا طايلة.
-بدي ممثلة صبية وحلوة وسكسي.
-ايه معك حق، فاتن مش زابطة، ما بحياتا عملت بوتوكس، ولا بحايتا استقوت وضربت رجال بوكس. هلأ بتتصلك بمنى طايع، ما في غيرا ممكن تكتبلك شخصية قوية قادرة تفرجي الرجال نجوم الضهر. اما بالليل فلازم طبعا تضهري وتسهري، هيك ممكن تتعرفي على حدا احسن منو
-طيب وبركي الاحسن منو عمل اضرب منو ؟
-ايه عادي، ما حصلش حاجة، ساعتها بترجعي بتشغلي الCD
- ايا CD؟؟؟سميرة سعيد؟
-لأ ، اكيد بيكون انتزع. ركّي عالبطيخ. ” بلا حب وبلا بطيخ” لفارس كرم
-يييي…. يؤيرني انشالله شو كان يحب البطيخ.
– مين؟ فارس كرم؟
-لأ، حبيبي
-وبطّل يحب البطيخ؟
-لأ، بطّل يحبني الي.
أحدث التعليقات