ذكرياتي عم توميلي… بقلم جوزفين حبشي

بقلم جوزفين حبشي

ما في غنّية ما بتذكرنا بموقف او مرحلة من حياتنا, وما بترجعنا للماضي وبتخلينا نحس حالنا ابطال بفيلم ” ذكرياتنا الحلوة” . وساقبت سمعت امبارح غنّية قديمة بتقول:
When i ‘m with you it’s paradise
No place on earth could be so nice
Just take my hand it’s paradise
you kiss me once
I’ll kiss you twice
‎هيدي الغنية لفيبي كيتس ، رجعتني فورا لأيام الجامعة. يومها كان عمري ١٧ سنة وكنت عم بعمل صحافة قبل الضهر وعلم نفس بعد الضهر، والرئيس ميشال عون كان بوقتا إلو سنة عم يعمل حرب التحرير ليل نهار على طرق النفس. يومها كنا 5 اصحاب( انا ومارتا وباسكال وفادي وفرنسيس الملقب بفرانسوا) عم ندرس علم نفس ونفسنا دايما مفتوحة على السهر رغم القصف والطرقات المقطوعة. وبيوم من الايام قررنا انو لازم نسهر بنايت كلوب بجونيه وجامعتنا بالفنار، وطريق نهر الكلب عند التونال( النفق) مقطوعة.
‎نسيت كيف وصلنا خمستنا قبل التونال بشوي، بس بتذكر منيح انو صفيّنا سيارة فرانسوا شي مطرح على جنب الطريق ، وقطعنا التونال مَشي نحنا وحاملين كتبنا، مع ناس خايفين وحاملين شنط تياب وربطات خبز وفرشات اسفنج. بعد التونال، كمّلنا اوتو ستوب على نايت كلوب…يا الله شو كان اسمو؟؟؟؟ كان كتير مشهووووور … ايه، كان اسمو ايكينوكس
???
‎المهم وبلا طول سيرة فتنا سهرنا
‎وكانت الساعة بس 8 على اساس ما فينا نتأخر وعنا بالرجعة سحبة مشي بنت كلب على نهر الكلب، ولازم نسرّب على بيوتنا قبل الساعة ١٢ لأنو طبعا ما خبّرنا اهلنا نحنا وين.
‎المهم سهرنا وكان النايت شبه فاضي، وانا ما كنت بعد معودة اسهر بنايتات، وصرّت ملبكي شو لازم اطلب لما يسألني البارتندر شو بدي اشرب؟ زتيت دينتي وسمعت اكتر من بنت عم يطلبوا مدري شو بس “سان زالكول”.
( sans alcool)
‎انا صراحة حفظت “سان زالكول”، ولمّا سألني شو بدّي، جاوبت بكل ثقة: “”بيبسي سان زالكول”…

‎ليلتها رقصنا على
When i m with u it ‘s paradise
U kiss me once , i kiss u twice
‎وسرّبنا بعدها على البيت.
‎هيديك الايام، رغم كل وجعها
‎ومشاكلها وحربها ، كانت بالنسبة
‎إلنا عن جدّ
Paradise…