ما بدي عيش غير حياة… بقلم جوزفين حبشي

ما بدي فل
ما بدي روح
ما بدي عيش غير حياة
ما بدي غير ناس، وغير جو، وغير لغة، وغير اهلين وبونجورين وصحتين. ما بدي غير طرقات حتى لو كانت اوتوسترادات واسعة ومزفتة ومن دون جور. بدي زمامير سيارات(برا ما حدا بيزمّر)، وما بدي غير شوفيرية السرفيسات وتحليلاتن السياسية من الروضة للزلقا ومن الحمرا للاشرفية. ما بدي جرايد غير النهار والجمهورية ونداء الوطن والاخبار عم يتشمسوا عحبال كيوسكات الرصيف قدام البياعين، وما بدي غير اصوات فيروز وصباح وراغب ووائل ونوال واليسا وملحم عم بيلعلعوا من شبابيك السرفيسات، وقهاوي البحر وفرح الناس المتشبثين بلحظة فرح. ما بدي غير جراس كنيسة سيدة البرج بدير الاحمر، ومآذن جامع محمد الامين بوسط بيروت، ما بدي غير صالات غراند سينما وامبير وسيتي مول وافلام زياد دويري ونادين لبكي وفيليب عرقتنجي وامين درة وسمير حبشي واسد فولدكار ولارا سابا، ومسرحيات بيتي توتل وجو قديح وكميل سلامة ومروان نجار، ومهرجانات ارز وبعلبك وبيت الدين. ما بدي غير ريحة منقوشة الزعتر بالافران، والقهوة من دون سكر وهيل بفنجان الشفة، وشاي وزهورات ومليسة وليموناضة من عند حلمي بالبترون، وبوظة حنا متري بالاشرفية، وساندويش فلافل فريحة وابو اندريه مع زيادة طراطور. ما بدي رفقة غير رفقاتي واصحاب غير اصحابي ، ما بدي غير لينا وراشيل ونادين وديامان وغابي وشهير وجاكلين ونوال والسي واوغيت وجومانا وسعدى وفاتن ومهى وسحر ولارا وانطوان وشادي وريكاردو وايزك وغاسيا وزيزي ورلى وبوطة قدامى المسيرة والنهار ودليل النهار والسينما والموركس . ما بدي انطر مسلسلات لغير السي فرنيني ومنى طايع ورندة كعدي ورلى حمادة ومارسيل مارينا ورندة الاسمر وكلوديا مرشليان ونوال كامل وهيام ابو شديد وجوليا قصار، وما بدي اضحك على غير ضحكاتنا
وتنكيتاتنا وسخريتنا الدايمة على كل شي وما شي. ما بدي غير اهل وغير اخوة وغير ولاد اخوة. ما بدي غير وطن، ما بدي ما بدي ما بدي.
بدي بس غير زعما، لأنو بدي ضل هون. هون انا. هونيك مش انا. وشو انا لو ما كل هالقصص اللي عملتني انا.