يلعن ابو التكنولوجيا: بقلم جوزفين حبشي

بقلم جوزفين حبشي

يلعن ابو التكنولوجيا. استرجي يتصل فيك حدا وما ترد. عالسريع بيكمشك، لأنو بيفز عالواتساب ليشوف ايمتى ال last seen, واوعا تفكر حالك حربوق كتير اذا شايل ال last seen من ال settingsعندك، لأنو شارلوك هولمز السئيل رح يكمّل جولة تحرياتو على فايسبوك ورح يلعن ابوك لما يشوف ايا ساعة نزّلت آخر post. مش بس هيك، حضرة 007 ممكن يحوّل على ميسنجر ليراقب اذا انت active now.
هلأ اذا هيدا الحدا مجرد حدا سئيل، بسيطة. بس اذا كان شي حبيب غيور، انا بنصحكن تبعتولو غنيّة فيروز، معدّلة شوي، لتناسب الحب بالزمن الافتراضي:
‎لا أنت حبيبي ولا عملنا تشات سوا
وال story عالانستا، شلعها الهوا
وصرت عنك غريييييبة
عملتلك block يا حبيبي