جمالك تاج مع احلى ماكياج…

مشهد سوريالي بقلم جوزفين حبشي

عندي صديقة ، هي بتعتبر حالها “بشعة” ، وانا بلاقيها مش بشعة لأنها كتير مهضومة، حاصلو، لا مجال هلأ لتحليل وتحديد معاني الجمال لأنو اصلا ما عم فكر انجح بفحص اسئلة ملكات الجمال، لا انا ولا صاحبتي. المهم وبالعودة لصاحبتي اللي بتعتبر حالها كتيير بشعة، وما بحياتها حاولت تزبط حالها وتنتف حواجبها وتتبوّدر وتتحمّر وتتكحّل، قررت هونيك نهار انو تروح تعمل ماكياج بروفيشنل فرد مرة لأنها معزومة على عرس مهم. وبما انها مش خبيرة بالموضوع، وما بتعرف ال makeup artists المهمين بالبلد, قامت المسكينة هي وبسيارتها على الطريق، بتشوف يافطة على بلكون بناية، تاشة ومشطشطة كحلة حروفا من الشتي، وبصعوبة بتقرا:
جمالك تاج،
مع احلى ماكياج….
وصدقت صاحبتي، وصفت سيارتها، وعربشت عالطابق التاني من البناية، مطرح ما اليافطة مربوطة عدربزين البلكون. بتدق وبتفوت وبتتفاجأ بصور بنات بيهبلو قد مل هني حلوين ومبودرين ومحمرين. صاحبتي اتفاءلت بالخير. بتبتسم للصبية القاعدة ورا الطاولة وحاطة علكة بتمّا.

• ايا ساعة موعدك مدام؟
• مش اخدة موعد
• مش اخدة موعااااد ؟؟؟؟؟؟
  هون اصفرّت واخضرّت صاحبتي، وفقدت الامل انها تتحمّر وتتبوّدر، وبرمت بارضا وتوجهت صوب الباب. وإذ بتصرخ فيها الصبية هي وعلكتها: لوين مدااااام؟
• انو لبرا. ما انا مش اخدة موعد.
• حظك حلو مدام.في ست لغيت موعدها من شوي. رح فوّتك محلا.
  هون انبسطت صاحبتي وشكرت الله انو فيها شي حلو: حظّا. وهيك فاتت صاحبتي، وانبطحت عالشاريو، وبلّشت ال ” makeup artist” تفرفك فيها، وتدهونلا كريمات وتطلسلا الوان وتركبلا رموش ، وصاحبتي ضحكتها شبر، الى ان… شافت حالا على المراية . جمدت صاحبتي فجأة، والتفتت صوب خبيرة التجميل وقالتلا هي ومرعوبة: مين الست؟؟؟؟
  هون، بترد عليها ال makeup artist بابتسامة عريضة : هيدي انتي مدام. شفتي شو تغيّرتي؟ معك حق ما تعرفي حالك. طالعة متل القمر اسمالله…
  هون صاحبتي بتبلع بريقها، وبتقلا للخبيرة: الله أمَر بالستر… وحضرتك مين مدام؟
• ولو!!! انا ال makeup artist
  صاحبتي البشعة، اخلاقا حلوة عادة، وعادة بتحاول ما تجرح حدا بكلمة لئيمة . بس يومها ما عاد فيها بلعت اللي صار، لهيك فقعتها مونولوغ طولو صفحتين بكل لأمنة: ” انت اكيدة انك خبيرة تجميل؟؟؟؟ وبكل ثقة عم بتقوليها وصامدة يافطة على البلكون؟ ولك انت انجأ انجأ ساقطة صف الدوزيام A بمادة التلوين والرسم, ولك انت،انت، انت(هون كانت مرددة تقولا بس بالاخر قالتها)؟ولك انت خبيرة تجميل قدّ ما انا حلوة…
  خلاصة الحديث، الmakeup artist لازم يكون artist, يعني فنان، ومش كل مين “شخبط شخابيط ولخبط لخابيط ومسك الالوان” صار اسمو فنان.