ذكرياتي عم توميلي ٣: دوموازيل انت ” فيارج”؟؟؟؟ بقلم جوزفين حبشي

جوزفين حبشي

هو، بنبرة استنطاقية مخابراتية: دوموازيل، انتِ ” فيارج”؟؟؟(vièrge)
انا، بنبرة يا غافل الك الله: لأ، انا من برج العقرب، خلقانة بتشرين التاني، “الفيارج” خلقانين بايلول…
هيدا الحديث عمرو تقريبا ٣٠ سنة. يومها كان عمري ١٨ سنة، وكنت طبعا بالجامعة، وواقفة على الطريق بالفنار قدام كلية الاعلام، ناطرة حدا “يشحنّي” معو ” اوتو ستوب”( كانت دارجة يومها متل الفيارج يعني) على كلية الاداب بالفنار العالي، حيث كنت ادرس علم النفس كمان( فِتحة كنت يومها بالدرس بس على ما يبدو). المهم، واقفة على الطريق، والدني كانت عم “بتبخبخ” بالشتي، وما كان معي لا سيارة ولا شمسية، واذ بتوقفلي سيارة فخمة، فيها رجال اربعيني، طارق كشرة ما بتفهم. حاصلو ابتسمتلو وسألتو اذا واصل صوب الجامعة فوق عالعالي؟ هزّلي براسو. طلعت . مشيت السيارة طلوع وهو صار يتطلع فيي طلوع نزول، بس والحق يقال، كان مركّز اكتر طلوع، صوب وجي. انا هون شو قلت؟ شكلي عجبتو، وهلأ بدو يسألني شو اسمي واذا في مجال نتعرّف، وانا قصدي شريف، واذا بدك بفوت لعندكن عالبيت، وبتعرّف على اهلك، والي الشرف كون صديق بنت حلوة ومثقفة متلك، عم تدرس صحافة قبل الضهر وعلم النفس بعد الضهر. بنت مكافحة، عم بتركض من جامعة لجامعة وما معها اجار ” سرفيس” و… قبل ما كمّل سيناريو الحوار المرتقب بيني وبينو، بيفاجئني بسؤال وهو بعدو مفوكس على وجّي:
-دوموازيل، انت ” فيارج”؟
انا، وبنبرة يا غافل الك الله، بجاوبو بمنتهى البراءة : لأ، انا من برج العقرب، خلقانة بتشرين التاني، “الفيارج” خلقانين بايلول..
هون بتتحوّل كشرتو لتعصيب، وبيقلي بنبرة المستغشمني:
-مين جاب سيرة الابراج؟ انت، انت بعدك ” فيارج”؟ ما عندك بعد “رولاسيون سكسويال”؟؟؟؟
انا هون تمنيت شي سكسويل يخبطني ويخفيني تحت سابع ارض ، وللحقيقة تفاجأت. انصدمت وتفاجأت، انو شو هالسؤال؟ وشو خص وجي اللي عم بيبحلق فيه، بسؤال من عالنووووع؟؟؟؟ انو مكتوب على جبيني اني عذراء؟؟؟؟
بارتباك قلتلو: لأ
بتعصيب بيقلّي: لأ شو؟ مش فيارج والا ما عندك رولاسيون سكسويال؟
انا بارتباك : لأ، ما عندي رولاسيون سسك( روكبت معي الكلمة) سكسويال( رجعت زبطت).
هون بيفنجر عيونو وكأنو ما عم بيصدق دينيه، وبيصرخ فيي: شووو؟ معقول؟ قديش عمرك؟
انا بخوف وامل انو الاجابة تشفع فيي: ١٨ الا شهر.
هو: شووو؟ وكمان عمرك ١٨؟
انا: الا شهر
هو: انو كيف هيك؟ليكي دوموازيل، انا جينيكو( طبيب نسائي) وضروري قلك انو اذا مش كرمال السكس، لازم تعملي سكس كرمال وجك، مش شايفي الاكنيه( حب الشباب) بجبينك وخدودك؟؟؟؟ هيدا شي نورمال، متل الاكل والشرب. بأيا زمن نحنا عايشيييين؟؟؟؟
-انا هون احمرّو خدودي الحمر اصلا بسبب “الاكنيه” واستحيت كتير من حالي للصراحة،واتمنيت الارض تنشق وتبلعني، وحسيت بشعور بالذنب تجاه وجي، وحطيت عيوني بارض السيارة متل اللي عاملة عملة ما بتنعمل. انو يا جرصتي ويا عيب الشوم عليي، كيف هيك بعمل هالجريمة بحق حالي؟
الله ستر وكنا وصلنا قدام الجامعة. نزلت بسرعة وانا عم خبّي وجي اللي فضحني ومسّح فيي الارض، من دون ما قلّو مرسي للدكتور العظيم عالتوصيلة والاستشارة الطبية والتجميلية والحقوقية والجنسية….
هيدي القصة صارت من تقريبا ٣٠ سنة، ويومها انا كان بعدني “حمل” وديع واستحيت اقبرو لهال “ثور” وقللو يبعتلك ” البرج الرابع” ….
صحيح الايام تغيّرت بس بعد لهلأ في بنات يمكن خيارن يبقوا ” فيارج”، وفي اطبا نسائيين تحديدا بيتفاجأوا وبيسخروا من خيار هالبنات. يمكن انقلبت الايام، بس المهم القناعات ما تنقلب. كل انسان حر بخياراتو، ونصيحتي لكل بنت ممكن تتعرض لسؤال” انت فيارج” اليوم، تقول للحشري اللي عم يسألها:” لأ انا من برج العقرب”، وتعقصو او تقرصو ، لأنو ببساطة ما خصو.