رسالة الى فيروز، ومنها الى ماكرون بقلم جوزفين حبشي

كتبت جوزفين حبشي:

الو، كحلون ، فيروزتنا؟
فيروز يا فيروز، نحنا ما رح نقدر نشوفو، بس هو رح يشوفك إلك لأنك انتِ رمز لبنان الحلم الحلو والاسطوري والابدي والسرمدي.
دخيل اجريكي، قوليلو ما بدنا نكمّل باللي بقيوا. برحمة سالم الغفيان ومغطى بعلم لبنان، قوليوا ما بدنا نكمّل باللي بقيوا. كرمال شادي اللي ضاع، ما بدّنا نضيّع وقتنا مع اللي بقيّوا. وحتى ترجع العصفورة تعشش بالقرميد ، وحتى يرجع يصير في قرميد من اصلو، وحتى ترجع المدارس اطفال وتلج وعيد، قوليلو هني لازم يروحوا، يضلوا يروحوا لتخلص الدني، دنيتهم، وتبتدي دنيتنا.
وحتى قصايدك توصل لآخر الدني، وحتى نرجع من حرايق ومن شوارع هدمتها مدافع وانفجار نووي، ولحتى لبنان الحقيقي، لبنان البساطة يقدر يجي من جديد ،ويشيل الوجوه المصبوغة والوعود المدموغة، و ياخدهن الشتي ، لازم ياخدهم القادر على كل شي، ويخفيلن وجوهن السودا بألوان الموت والفساد والضمير الميّت….
فيروز، قوليلو هالسيارة من زمااان مش عم تمشي وبدا حدا يدفشها دفشة. فيروز ما عنا امل غير انتي، انتي اللي بنيتيلنا لبنان اخضر حلو، دافعي عن وطنك ووطنا قدامو، اهدمي الهيكل على راس كل مين مفكر حالو راس ببلدنا، وهني انجأ حشرة. قوليلو صحيح نحنا قلال ونكون قلال، بس بلدنا خير وجمال. قوليلو صحيح بلدنا زغيّر ، بس بالحق كبير وما بيعتدي يا بلدي.
قوليلو، قوليلو، كل اللي نحنا عم نقولوا من سنين، وما حدا عم يسمعنا، وما حدا عم بيرد علينا. قوليلو، لأنِك انتِ “الصوت” ، الصوت اللي بيوصل لكل الدني، لفوق، لأبعد من الغيم، لعند ساكن العالي، اللي بمجرّد ما يسمع صوتِك، رح يطل من العالي، ويفتّح عينو علينا، على أراضينا
،ورح يبعّد هالمجرمين، ويرجّع إخوتنا وأهالينا.
الو، الو، فيرووز…. ايه، ايه بعدني معك، اوووف، خفت يكون انقطع خط الواتساب كول. الحمدالله عم تسمعينا.