ريما امي، جايي لعنا ماكرون… بقلم جوزفين حبشي

نمت وحلمت….فيروز عم تنده: ريما، ريما، جايي لعنا ماكرون…
يا الله، انشالله مسيو ماكرون يقول انو جايي وما يجي، الكذبة مش خطية ، با دو بروبليم. شو يا ريما؟ رح يجي؟ ايه مزبوط معك حق، رح يجي، وحدن الحكّام عنا نحنا كذابين منافقين، بيوعدوا وما بيوفوا.
يا الله، شو جابو عليي ماكرون هلأ؟؟؟ ريما، ريما وينك امي؟ تعي اصبغيلي شعراتي، وابعتيلي الفستان اللي لبستو بمسرحية بترا عالتنضيف، اذا هو رئيس، انا ملكة .
يا الله ، ايا ساعة جايي؟؟؟ 6:30 المسا؟ ليك على هالتوقيت، على وقت مسلسل ” الضيعة بألف خير” عتلفزيون لبنان.ريما، شو رأيك نستقبلو بغنيّة؟ لأ، “كيفك انت ملا انت” مش زابطة، بدي غنّية تليق بالمناسبة. رح استقبلو ب: اهلا وسهلا نورت الدار والشمع الاحمر يضحك للنار. حلوة ما هيك؟ طيب فزّي بسرعة عالدكان وجيبيلنا نص دزينة شمع احمر…
ريما، رجعتي من الدكان؟ ليش تأخرتي؟ لهاكي حنا السكران؟ لكان شو؟ اكيد كان في بنيّات و صبيان ولعبتي معن عالمي. ولوّ يا امي، فاضيين نحنا هلأ؟ جايي لعنا ماكرون…
ريما، امي، شو قولك؟ لازم قلّو شي كومبليمان، عيب معذّب وجايي ،واكيد رح يقلّي اسمالله عليكي مشبشبة بالفرنساوي. شو رأيك قلّو:
يا ماكرون السيف اللامع
من صخب باريس راجع،
يا مسيو لو بريزيدان،
شبهتك بأرزة من لبنان .
ريما، الزلمي جايي وجايبلي معو سلام ووسام. شو لازم اهديه؟ بتعرفي شو؟ رح قدملو نسخة من مسرحية” صح النوم” ، اكيد رح تعجبو قصة قرنفل اللي عايشة تحت الشمسية وناطرة الحاكم اللي ما بعمرو وعي ، انو يوعى من النوم، ليختملا طلبها وتقدر تعمّر سقف بيتها اللي تهدّم فوق راسا بالانفجار النووي على مينا الحبايب ببيروت.
ريما، قولك رح يسألني عن الوضع بلبنان، وعن الاهل والجيران والاخوان؟ مش مشكلة شو ما يسألني، رح جاوبو: نحنا والقمر بس بس جيران، غيرو جيران ما بدنا، الله يسعدن ويبعدن هالجيران. ما اجانا منهم غير وجع الراس والقلب والجسم والاطراف. شو ريما؟منيح الجواب؟
ريما، شو بدّنا نضيّفو؟ لأ ، شامبانيا شو؟ لازم نضيّفو شي “تيبيكمان ليبانيه”، منضيفو فنجان مليسا او زوفا عالسريع، بركي ما بيطوّل. لأ، ما تواخذيني أمي، ما رح قلو سهار بعد سهار ليحرز المشوار، انا ارملة امي وانتي بعدك تحت نصيبك، ما حلو يطوّل عنا، ما بتعرفيهم قديّش بلفقوا اخبار؟ خلص بيشرب فنجان سخن، منحكي كلمتين، بيعلقلي الوسام والله معو، وهيك بركي بلحّق قطشة من مسلسل”الدنيا هيك”…
…. بعدني نايمة
ويلا تنام زوزو، يلا يجيها النوم
لنكمّل الحلم ونعرف تفاصيل، هيك هيك نشوف فيروزتنا، حلم من الاحلام.