مبروك بدء تصوير الفيلم ‎ويتربّى بعزّكن

‎‎بقلم جوزفين حبشي

مبروك يا عمار شلق وغابريال يمين وشادي حداد وباميلا الكيك ورلى بقسماتي ورامي عطالله، ويتربّى بعزّكن الفيلم اللي جايي يا ايزك فهد ( المنتج وكاتب السيناريو بمشاركة دوريس سابا) وسام لحود( المنتج) والمخرج دافيد اوريان، وانشالله قريبا رح ناكل ” مغلي” بعدما تقرر بدء تصوير هالفيلم الكوميدي -الدرامي المليان طرافة ومواقف انسانية مؤثرة ، قبل نهاية شهر حزيران ٢٠١٩.

‎القصة حلوة وما شفنا متلها بعد ‎بالسينما اللبنانية وبتدور حول “كوبلين” من طبقة اجتماعية مختلفة، رح يلتقوا سوا بمستشفى ، والفيلم رح “يخلفلنا” مواقف طريفة ولا اهضم على خلفية واقع لبناني انساني مؤثر ، مع كتير من العمق بالمضمون والخفة والرشاقة بالتقديم ، خصوصا لما يصير في تصادم بين الثقافات والبيئة والعقلية.
‎اضافة للرباعي الدفع ( عمار شلق، رلى بقسماتي، شادي حداد وباميلا الكيك) بيشارك بالفيلم مجموعة من اهم الممثلين اللبنانيين متل غبريال يمين، نقولا دانيال ، تقلا شمعون و غيرهم. الف مبروك هالفيلم الاوريجينال ( قريبا رح بيسمّوه) ، وتشوفوه ناجح وتشوفولو خي واخت سينمائيين، لأنو المتل بيقول ” بيجي الفيلم ويتجي رزقتو معو”، وناطرين المغلي والبقلاوة يوم الافتتاح ب ١٠ تشرين الاول / اوكتوبر ، على احر من الجمر .