سبب طلاق ماريتا

جوزيفين حبشي

رأي

“اليكم سبب انفصال ماريتا الحلاني وكميل ابي خليل”…..
ييييي، ييييي ، يييي ، اول ما قريت العنوان، ما عرفت كيف كبست على اللينك، لاعرف اخيرا شو سبب الطلاق، لأنو فرطت اعصابي من امبارح لليوم، وانا كل نص ربع تكّة يوصلني notification من المواقع الاخبارية : “طلاق ماريتا الحلاني”، من دون أي اضافة بتكشف السر ورا هالطلاق. كل المواقع على طرق النَفَس ، نشروا خبر الطلاق، استعملوا ذات المفردات والمعلومات copy paste , ما اخدوا نَفَس ليتحرّوا ويجيبولنا شي سكوب، ( معن حق، اوعى ما يواكبوا اطلاق الصاروخ ع كوكب اورانوس، بالثانية نفسا)، حتى ما عذّبوا حالن يدّقوا لليلى عبد اللطيف مثلا، ويسألوها شو ممكن يكون سبب الطلاق حسب الهامها. انا محلّن، كنت عملتا، وكانت طلعت trend… قديش بعد بدّكن فتّ خبز.
المهم ولنرجع لموضوعنا، قريت من شوي على احد المواقع: “اليكم سبب انفصال ماريتا الحلاني وكميل ابي خليل”…..ييييي، ييييي ، ييي ، اول ما قريت العنوان، ما عرفت كيف كبست على اللينك، لأنو رح يفقع قلبي وتفقع مرارتي من امبارح لأعرف السبب. كبَست وانا عم صلّي ما يقطّش الانترنت، وما يوقف ال wifi, لأنو رح يفقع قلبي وتفقع مرارتي لأعرف السبب. كبَست وانا عم حلّل بيني وبين حالي شو ممكن يكون سبب الطلاق؟ شو؟ خانها؟ خانتو؟ ما بتعرف تطبخ؟ بيشنخر بالليل؟ حماتو اجمل واسكس من حماتها؟ شووو؟ وإذ… فتح اللينك وقريت: سبب الطلاق، عدم التوافق!!!!! عن جدّ؟ قولوا والله؟