سلسلة دراما رمضان(٢) الكاتب…الاذكى

بقلم جوزفين حبشي

انتشرت اقاويل كتيرة عن انو مسلسل الكاتب مسروق من كاتب عربي، او مقتبس من عمل اميركي… يقولوا شو ما يقولوا، بس انا بقول انو ” الكاتب” مستوحى ومش مقتبس عن عمل اميركي( مجرد تشابه بشخصية الكاتب وجرائم قتل رح تحصل، وغير هيك ما في شي مشترك ابدا). يقولوا شو ما يقولوا، بس انا بقول انو الكاتب من اهم واقوى المسلسلات، ومش لهالموسم الرمضاني بس. مسلسل انا عم تابعو بمتعة كبيرة لأنو مختلف، ذكي، كامل متكامل، في رؤية، في مناخ، في اجواء، في تركيبة شخصيات مرسومة بالوان صارخة وصاخبة ونافرة.

النص ذكي ومشوّق ومليان باحداث مفتوحة على احتمالات، بتفتح بدورها بكل لحظة، ابواب جديدة على غموض جديد. الاخراج رائع، آخد وقتو ورغم هيك ما في اي وقت ميت، سريع وبذات الوقت مش عم يسلق الاحداث. الادارة الفنية ساحرة، خالقة مناخ خاص جدا، بيذكرنا بال”كوميكس” comic books, من خلال الشخصيات ولعبة الاضاءة والنقلات بين الواقع وخيال الكاتب. مناخ بيرمينا بعالم هو مزيج من الوهم والحقيقة، من الالوان الصارخة والابيض والاسود ، من المتعة والتشويق.
ادارة الممثلين بتأكد انو رامي حنا استاذ بهالمجال ، وكل الممثلين عم بيشكلوا عجينة وحدة مدعوكة منيح .
باسل خياط , شو هالممثل الكبير، اللي بيتقمص الشخصية لدرجة مننسى انو عم بيأدي دور. باسل خياط عم يتنفس شخصية يونس جبران، مع كل نظرة بتلمع بالجنون، وابتسامة ابليسية، ومبالغة هي من شروط كل شخص عندو جنون العظمة متل شخصيتو . شو هالممثل الرائع اللي بلحظة منحسو طفل، وباللحظة التانية بيتحوّل شيطان، وولا لحظة بتفلت منو هالشخصية الصعبة. دانيلا رحمة رائعة ومرة جديدة عم تثبت انها ممثلة ومش مجرد بنت حلوة، إن ببراءتها وهدوءا ورقيها بالقسم الاول من المسلسل، او لما تتبدّل ملامح شخصيتها، وتبلش تجنّ وتغار وتحس تباعا بالخوف والشك والقلق. دانيلا ممثلة جيدة جدا ومشوارا انطلق، واداءا ما بيقل اهمية عن دورها الناري بتانغو. ندى ابو فرحات ” وحش” تمثيل، حضور وكاريزما واداء مقنع. ندى ابو فرحات منصدقا ، مكسورة كانت او ثائرة ، مجنونة او هادية. كل الممثلين رائعين، من العمالقة امثال نقولا دانيال وغابريال يمين، للوجوه الجديدة متل الصحفي رائد ( ايلي نجيم) ، والممثلة اللي عم بتأدي دور تمارا ( ما بعرف شو اسما).
الكاتب، مسلسل ذكي، قوي، حاضر بكافة تفاصيلو لحتى يحترم عقلنا ويحرّض خيالنا وما يخذلنا، واللي عم بيتابعو بيعرف بسرعة ليش اختارتو “نتفليكس” لتعرضو كل يوم، طيلة شهر رمضان، الساعة سبعة مساءً.
الكاتب، عن رؤية وسيناريو حوار لريم حنا، واخراج رامي حنا، وطبعا من انتاج ” ايغل فيلمز”(جمال سنان).