سيناريو

جوزفين حبشي – Josephine Habchi

شافتني متضايقة شوي، قالتلي
-خير شو في؟
-ابداً، سلامتك
-بالشرف شو في؟ ليش متضايقة؟
تركتي انت وصاحبك؟؟؟ اوعا تزعلي، اريح، صدقيني، وبعدين واحد بيروح، ٣٠٠ بيجوا.
-لأ
-اوعا تكوني مريضة؟ وحدا الصحة اذا بتروح ما بترجع.
-الحمدالله صحتي حديد، دقيلي عالخشب.
-طيب شو في ؟ ليش “مدبرسي”( من ديبريسيون يعني اكتئاب) ؟ عايزك مصاري؟
-للعايزني، عايزني
-عايزك وما بتقولي؟؟؟ ولشو عازتن الاصحاب؟ تكرم عينيك. قديش بدك؟ قولي؟ بليز ما تستحي
-عن جد تانكس كتير بس لأ شكرا.
-ولا يمكن شوفِك متضايقة شوي وما ساعدك. يللا قديش بدك؟
-والله خجلتيني بس اذا مصرّة٣٠٠ الف
-يخرب زوقيك انشالله، مش حرزانة تضايقي شوي على ٣٠٠ الف…
وهون بتفتح جزدانها بسرعة. وانا هون ببلع بريقي ، وبقلها بخجل:
-٣٠٠ الف دولار مش… ليرة?
وهون هي بتنبلع، و بتجؤرني جأرة لتتأكد اني مش عم بمزح وبتقول:
-بتعرفي شو؟ اتضايقي حبيبتي شوي، ما بيأثر ، احسن ما انا اللي اتضايق كتير.
ملاحظة: ال ٣٠٠ الف دولار لانتاج اول سكريبت سينما كتبتو من وحي قصة خيّي المهضوم روي من كم سنة، وبعدني مصرّة انا لاقيلو انتاجو. احسن ما تشوفوني متضايقة وتسألوني وتصرّوا عليي ويرجع يتكرر السيناريو. ما عاد ايللي جلادة اشرح كتير وانبخع شوي.?