فن ومشاهير
ليلى عبد اللطيف: ماغي ونادين ودانييلا وسيرين معاً في رمضان ٢٠٢٦
بمخيّلة جوزيفين حبشي
فجأة خطر عبالي، هالسيناريو الخيالي:
جلست، والخوف بعينيها، تتأمل فنجانها المقلوب .. قالت” الله يستر، عالم الدراما رح يكون مقلوب فوقاني تحتاني برمضان ٢٠٢٦، والمعارك الطاحنة على الجمهور هي المكتوب”.
حطّت ليلى عبد اللطيف الفنحان من ايدا اليمين، وحملت السيلولير بايدا الشمال، فتحت group video call على الواتساب، حطت فيه ماغي ودانييلا ونادين وسيرين ، وكبست: call….
ليلى:
الو… صباح النور يا نجمات لبنان. بعتذر عم دقلكن بكير، بس قلت خليني حطكن بمشهد توقعاتي لرمضان ٢٠٢٦ ، قبل ما توقع الفاس بالراس.
ماغي:
والله منك هيّنة يا ليلى، انا جمعت فنانات لبنان عالعشا بمطعم غير شكل، وحطيت نيفتي، والعشا ما كان راس نيفا، لااااا، كله كان من فئة السومون والكافيار وطلوع ، ويا ريت عجبن. بس إنتي؟ عن جد مديرة وقديرة، جمعتينا كلنا، قبل طيز الضو ، على انجأ فنجان قهوة.
دانييلا:
طيز الضو؟؟؟؟ OMG , ماغي انسيلي هلأ “سحر” وتعبيراتا الvulgar ، خلصنا من ” للموت”.
ماغي:
nowaaaay “سحر” تروح يا “روح” روحي انتي. “سحر” شخصية ” غالية” على قلبي ، وبتمشي “بالدم” بعروقي. هيدا ” دور العمر” بالنسبة إلي، واذا مش مصدقتيني، اسألي سيرين
سيرين:
Sorry ماغي، دانييلا معا حق، سحر كتير vulgar وقد ما زبّطت حالا ، بتضل بنت شوارع. الكلاس إلو ناسو يا cherie. شو جاب سحر لل “ديفا” اللي معودة عكفوف “الدانتيل”؟
ماغي بابتسامة سحراوية:
ايه معك حق، شو جاب لجاب. بس يا ريت ما تنسي انو سحر مستحيل الناس ينسوها ولو بعد ١٠٠ سنة . سحرا لسحر ابدي ازلي ومستحيل نقول عنه بشي يوم “ذهب مع الريح”، ومش أي ذهب، ذهب “٢٤ قراط”.
ليلى:
يا عمّي روقوا شوي، رح تنسوني شو كنت جايي احكي
دانييلا:
هس هس ،تشك تشك…اتفضلي احكي
ليلى:
خلونا ننطر بعد شوي، “ع أمل” نادين تفتح الكاميرا لنشوف طلتها البهية.
صوت نادين:
sorry ليلى ، بس بعدني عم بعمل makeup. رح حط ضربة Allure velvet glow من NADINE NJEIM BEAUTY على خدودي، ومسحة lip glow gloss 3D shine على شفافي، وبكون معكن صوت وصورة. يلا، ثواني بس.
سيرين بهمس:
ثواني بس؟؟؟؟ لتمرّق ال gloss على كل شفافا، بدا نص ساعة
صوت نادين:
سمعتك ست سيرين ، ويا ريت بتحلّي عن “سما” ربي انتي وتعليقاتك اللي بتعمل ” هزهزة” للبدن.
دانييلا:
oppa rinna rinna awoooo….ولعت بين نادين وسيرين. وينا الاستاذة غالية تحللنا الخلاف بيناتن؟
ماغي بهمس:
خلينا على حياد. مش سامعة بالمثل اللي بيقول ” المُصلح إلو تلتين القتلة”؟ يسطفلوا وانشالله بيدور شد الاكستنشن، هيك بيخلالنا الجوّ انا وانتي برمضان
نادين:
سمعتكن يا ست دانييلا ويا ست ماغي. إيه ما تسنّوا سنانكن السنة. من بعد ما اخدتلك هادي من سنتين يا ست ريم، السنة رح اخدلك ظافر العابدين يا ست ماغي. ظافر ما غيرو، حبة الكاراميل.
ماغي:
Caramels, bonbons et chocolats
وparoles paroles paroles , وما باخودش منك غير كلام يا ست نادين . و كلام الناس، لا بيقدم ولا يأخر، كلام الناس ملامة وغيرة مش اكتر. دخلك سيرين؟ مش انت اللي كنتي عم تتمايلي ورا جورج وسوف بكليب هيدي الغنيّة؟؟؟؟
سيرين بلأمنة:
امبلى، ومش انتي اللي كنتي تجيبيلي فنجان القهوة مع كباية مي ب”مريانا”؟
ماغي بابتسامة:
امبلى، بس انا تقدّمت، وانتي طواكي “النسيان”.
دانييلا:
oppa rinna rinna awoooo… ولعت بين ماغي وسيرين. وينا الكابتن سما تكلبشن وتزتن بالحبس؟
صوت نادين:
الكابتن سما مش فاضية هلأ، بعدا ب “صالون زهرة”.
ليلى عبد اللطيف:
يا لطييييييف، شو هيدا؟؟؟؟! كيف بدكن تجتمعوا كلكن سوا انتوا الاربعة بمسلسل واحد برمضان ٢٠٢٦؟
ماغي، نادين، سيرين ودانييلا بصوت واحد:
شوووووووو؟؟؟؟ نحنا الاربعة بمسلسل واحد؟
ماغي:
انشالله بتعقصك أم ٤٤ بالهامك وتوقعاتك يا ليلى عبد اللطيف
سيرين:
انا جاهزة. مستحيل اتهرّب من مواجهة ماغي. “العين بالعين” ، والسن بالسن، انا ومدام سنان السنة.
نادين:
يا ريت والله، بس انا ممكن انسحب السنة. عبالي افتح مشروع إلو علاقة بتصميم الازياء. هيك هيك عطانا عمره جورجيو ارماني، صار عنا نقص.
دانييلا:
وانا كمان out السنة. صحيح بخعته لنيكولا معوّض عالهوا، بس انا عن جدّ pregnant وما بيسوالي التعصيب ، وعم بتوحّم على الزيتون.
ليلى:
يا جماعة روقوا وما تنسحبوا. اذا خايفين تولع الحرب العالمية التالتي بيناتكن، طمّنوا بالكن، مش رح تلحّقوا تقبّروا بعضكن. ندين جابر رح تكفّي وتوفّي. شي رح يروح بزلزال شي غرق بالبحر، شي دبح على ايد خيو… قولوا آآآمين….
