فن ومشاهير
ماريلين نعمان… بليز نشّزي اكتر بعد
جوزيفين حبشي
متل النسمة، متل الهمسة، متل البونبونة اللي مستحيل ينشبع من نكهتها، متل الفرحة اللي بتجي هيك ع غفلة، هيك انتي. بس لا انتي ولا نجاحك وتميّزك إجوا هيك ع غفلة. النجاح والتميّز سببهن اخلاق وتربية واصالة وولاد حلال محاوطينك، بيزيدو على الموهبة وهج ما ممكن ينطفي. صحيح ما النا زمان منعرفك، بس لأول مرة في اجماع كامل على موهبتك وعلى الاحساس بأنك قريبة منّا كلنا، وحدة منًا، بنتنا، صديقتنا، رفيقتنا، حلوة كتير من جوا وبرا متل شي نادر كتير صار بحياتنا، بريئة متل ما كلنا منتمنى نكون او نرجع.
ماريلين نعمان، متل حبة لولو انتي، كنتي مخباية بقلب صَدَفة، وبالصدفة اكتشفناكي، ومش بالصدفة حبّيناكي، ولا بشكل اعتباطي. حبيناكي قد منّك حقيقية، صادقة ، طبيعية، نقية، صوتك بغلغل بالروح والقلب، عيونك بتلمع اكتر من النجوم، اجريكي عالارض، راسك على كتافك، واحلامك فوق، بالسما، بالغيمة اللي بتشتًي علينا طاقة ايجابية وأمل بجيل متلك، قادر بعد يخلينا نتفاءل ببكرا، ببكرا احلى على كافة الصعد، الانسانية والحياتية والفنية.
آمان منك آمان يا ماريلين يا فراشة انتي، صحيح عمرك صغير، بس قلبك مليان بموهبة استثنائية، وصوت ملائكي وعاطفة صادقة وذكا فطري وعفوية لذيذة ونضج واحساس انساني، من الصعب نلاقيهن بهالايام ببنت عشرينية متلك.
آمان منك آمان يا ماريلين يا فراشة انتي، يلّي عم بتطيري وبتحلقي، ورح بعد توصلي لبعيد كتير، لكوكب مش مروّكب ، ولا فيه نشاز. جناحاتك الملونين بألوان الموهبة الحقيقية الاستثنائية، رح يوصّلوكي ، ونحنا مش خايفين عليكي ، جناحاتك ما ممكن يحترقوا بضو الشهرة، لأنهن محصنين متلك باصالة وتربية واخلاق وقيم وذكا وفريق عمل صغير متلك بالعمر، بس كبير كتير بالعلم والموهبة والابتكار ومواكبة العصر والتمسّك باصالة صارت متلك ،حبة لولو نادرة بهالزمن “الفالصو”.
ماريلين نعمان، ٥ الاف مبروك نجاحك امبارح بحفلك بالفوروم، ومليون مبروك اغنيتك الجديدة ” نشاز” اللي اطلقتيها امبارح، وبلييييز ضلّك نشّزي هيك، وياي شو حلو “الكليب” بتميّز فكرتو، وبساطة انتاجو، وضخامة الابتكار والحب الموضوعين فيه. انشالله بتضلك دايما محاطة بولاد الحلال اللي مآمنين فيكي بحب غير مشروط ومن دون استغلال، لأنو ايد وحدة ما بتزقف، وانشالله رحلة صداقتك وتعاونك مع ” البونبونة” لين طويلة، تكون متل اسمها( مش حجمها) كتييير طويلة.
ماريلين يا ماريلين، أمان منك أمان، ما شبعنا منك امبارح، وما كان بدّنا هدنة.
ماريلين يا ماريلين، يلا حلّقي بعد ، وكلّنا منقلك ” ما تخافي تطيري وتبعّدي لفوق، و مستحيل يصير في مسافة بينك و بيناتنا نحنا جمهورك، لأنك بنت عيلة، وبتعرفي انو العيلة اهم شي بالحياة، ونحنا صرنا عيلتك وانتي بنتنا واختنا وحبيبتنا. طيري وعلّي كتير لفوق ، المعي بين النجوم، تمايلي مع الغيمات ، شتّي علينا فرح وأمل وطاقة وموسيقى و”بيزويات” ، ويا ريت بتحملينا معك عكوكب مش مروكب، وحياة الله اختنقنا من النشاز على هالارض ، بدّنا نسمة وهمسة متلك، تغلغل فينا، وتقلّنا “على أرضي رِدّني”.
