ثقافة
مشهد متخيّل: ابو الزوز ناطر أبو الزيز
جوزيفين حبشي
لا، لا، لا، ما تفل، ما تفل…
بس زياد فل. واحزروا مين فرحته لقرعته؟ طبعاً جوزيف صقر. عم تتخايلوا المشهد معي؟ جوزيف ناطر زياد يوصل على أحرّ من جمر. عم يفرفِك ايديه ومش مصدق. اكيد معه حق، عاش كتير كتير كتير وحده بلاه. بس هلأ خلص. زياد صار واصل لعنده على… على وين؟ عالجنة؟؟؟؟ لأ، ما بحسّ ابو الزيز وابو الزوز رح ينبسطوا ويتّسلوا بالجنة. صحيح زياد لحّن اجمل التراتيل الدينية ، بس طول النهار صلاة وبخور وخشوع وهدوء نسبي، بلا ولا شي، لا مزحة ولا نكتة ولا مسبّة ، لا، لا ما بتقطع معن. طيب معقول عَ جهنم الحمرا؟؟؟؟ كمان لأ. مش لأنو زياد بيحب منطقة الحمرا، نقوم نتذاكى، ونربط بين جهنّم والحمرا ونقول رح ينبسط هونيك. لأ، جوزيف صقر مستحيل يكون اصلا هونيك، وما ممكن يستقبل زياد هونيك، مش بس لأنو زياد مش كافر ، لأنو كمان هول الجوز حوّلولنا جهنّمنا، جنة ابداع وموسيقى وضحك وتنكيت وسخرية على اللي كفَّرونا بهالبلد. فأكيد نحنا ما منقبل يروحوا نزول، مع إنو نحنا لا منقدّم ولا منأخّر، ولا حتى طلع بايدنا نخلّي يوم دفن زياد يوم حداد وطني.
طيب وين جوزيف صقر ممكن يكون ناطر زياد ليستقبله ؟؟؟؟ معقول على جسر اللوزية، تحت وراق الفيّة، قبل محطة دارينا؟ اكيد لأ، هني مش من هيديك المنطقة، وأنا بقول اكيد جوزيف ناطره عالباشورة، بسيارة مارسيدس تاكسي. بتشارطوا؟ واول ما يوصل زياد ع هدير البوسطة، رح يلحقو جوزيف بالبيك -آب، ويمرقوا سوا عَ ” سندي سناك”، ياكلولن لقمة ويشربولن كاس avec de la neige . لأ ولووو، ما رح يزعل سناك فيصل، ولا ابو اندريه من زياد. شو هني فيروز وريما لزعلهن يطوّل هني وياه؟ بعدين؟ ممكن كتير يمرقوا عال ” بلو – نات”، انو why not؟ والمِرجّح ينهوا السهرة بطقّة الضهر، بقهوة المعلم نخلة التنين، وسوا رح يرندحوا: “خلقنا سوا وعشنا سوا ورحنا سوا ، ضلّ تذكرنا يا هوى”.
هيدا بالنسبة لبرنامج استقبالات اليوم. بالنسبة لبكرا شو؟ شو بيعرفني انا؟ أنو ممكن كتير تتلفنلن سلمى (مش عياش ) وتعزمن و تلحّ عليهن و Quand est-ce que vous voulez venir prendre un verre chez nous? شو؟!!!
Screenshot
Screenshot
