ندين جابر تكتب “بريجيت بزَّقِتو الدم”

جوزيفين حبشي

ريما، ريما امي، روّجي اتصليلي بالرئيس ماكرون ، بدّي اتطمّن عليه. كيف ليش؟ ما عرفتي انو بريجيت سفقتو كف من كعب دستِك لكنِك عيرينا ؟وعلى ما يبدو خبطة كفها على خدّو هدارة، والبريزيدان آكل كف بيسوى عمره وراسو صار بالارض ، ويا ارض انشقي وابلعيه وغسيلن نشروه ع انترنت اليسمينا وصنوبر السوشل ميديا. كيف يعني شو خصنا؟ الزلمي صاحبنا يا ريما ريما الحندقة، وزارنا هون بالبيت ، وفي بيناتنا خبز وملح وانخاب ونياشين، لهيك لازم نتطمّن عليه.
عجّلي اطلبيه…
الو، الو، فيتنام؟ ماكرون؟ كيفك انت ملا انت بعد هالكف؟ ألو… ألو… ست بريجيت؟ هيدي انتي؟ العمى صوتك ارجل من صوت الرئيس. طيب ليش تلفون ماكرون معك؟ انشالله ما يكونوا هرّوا سنانو لهيك مش قادر يحكي. شو؟ كيف يعني مقاصصتيه؟ مركعتيه au coin ، ورافع ايديه لفوق لفوق لمطرح اللي بيوقف الزمان؟ آه ok, ممنوع يستعمل التلفون لمدة اسبوع؟ حتى لو دقّلو ترامب وبوتين؟ ايه برافو عليكي، ربّيه. بس انو يا بريجيت طوّلي بالك، وعدّي للعشرة وخبريني شو صار لما طارت الطيارة طارت وغطت على سطح فيتنام؟ كيف كيف كيف؟ لا هو حبيبك ولا ربيتو سوا؟ يا تسلميلي يا بريجيت اكيد ما ربيتوا سوا، لأنك انتي اللي مربيتيه، والا نسيتي؟ بس شكلك ما عرفتي تربيه مزبوط. على شو تخانقتو؟ هو قال انو كان عم يمزح معك، معقول ما بتتحملي مزح؟شو؟ شدك من بيروكتك الشقرا؟ آه هيدا شعرك الطبيعي؟ اسمالله شو عبي، اضحكي بعبّك يا بريجيت ، منيح اللي ما دبحك من بعد ما بهدلتيه قدام العالم كله. ليكي بريجيت نصيحة حاولي تلملمي الوضع، وقولي انك كنتي عم تمسحيلو تمّو من اثار السيريلاك، لأنو سمعت انو ندين جابر ناويي تكتب مسلسل من وحي العنف الاسري اللي عم يتعرضلو جوزك المصون. شو؟ ما بتعملها ندّون، لأنها نصيرة حقوق المرأة المأكول حقا وراسا؟ مزبوووط، ما لهيك تحديدا ، ندين عم بتفكّر تكتب مسلسل عن ماكرون، ومعقول كتير تسمّيه” بَزَّقِتو الدم”.