فن ومشاهير
يا سلام على نجوم لبنان في ” سلمى”
جوزيفين حبشي
وانطلق المسلسل المعرّب عن التركي “سلمى”. على شاهد صرت شايفة ٥ حلقات. بكير ينحكى عن المسلسل اكيد، بس مش بكير ابدا قول ” خمسة وخماسة” على اداء ٤ من نجوم لبنان. ليش بس نجوم لبنان؟ لأنه الاقربون أولى بالمعروف، فاعملوا معروف ما حدا يتهمني بالعنصرية. البقية جايي دورن، وخصوصا مرام علي اللي عم بتقدم اداء حلو كتير ومقنع اكتر
تقلا شمعون … الله على تقلا شمعون ، الله على كتلة الاحاسيس الطبيعية لدرحة مستحيل نقول انها عم بتجسّد شخصية. كيف هيك؟ من دون أي مبالغة أو أي مجهود ، بتتحوّل متل السحر ، لشخصية تانية، لمرا تانية، لتاريخ تاني، لمشاعر وانفعالات تانية. بتخيّط الشخصية متل شي فستان customized ، مخيّط عالطلب، عالبكلة، بتحبكه حبكة حبكة، بخيط ما ممكن يفلت منها . تقلا وببساطة شديدة، بتسوى تِقلا دهب.
نقولا دانيال. يا سلام على نقولا دانيال، يا سلام على الاستذة بالاداء ، يا سلام على هالأريحية وهالتلقائية والعفوية والصدق والبساطة والطيبة اللي عم بيقدم فيها شخصيته. ولِك نيال الفن اللبناني فيك يا نقولا دانيال.
في نقولا تاني، هو البطل الاول للمسلسل. هو نيكولا معوّض ، ويا حياتي على نيكولا، شو بيلبقله دور العاشق اللي عيونه بتلمع حنان، وضحكته بتدفّي اكتر من الصوبيا اللي انفحطوا فيها اولاده بالحلقة الخامسة. يا حياتي على الكاريزما وعلى الكيميا بينه وبين مرام علي. انا حسّيتن سمنة على عسل، وسكر محلي محطوط على كريما. لنقولا التاني ، الصغير بالعمر، رح قلّك انك موهبة كبيرة ، والاولية استحقيتا بجدارة أن كان بلبنان او بمصر وتركيا والعالم العربي، وحتى بهوليوود.
أما الختام المسك مع ستيفاني عطالله اللي ماسكة شخصية ميرنا البنت المعقدة ، وعندا اضطراب نفسي وغيرة مرضية من اختا، مسكة ما ممكن تفلت منها. اخخخخخ على ستيفاني، وقدرتها تتقمّص هالشخصية المركّبة، الصعبة بكل انفعالاتها المتناقضة. اداء ستيفاني بيخوّف ، تماما متل شخصيتها اللي بتخوّف بكل غموضا وشو ممكن تكون مخبّيتلنا من مفاجآت. اداء ستيفاني بيخلينا نحسّ بالتوتر، بعرق بارد مسقّع عم “بيزرزب” على ضهرنا. لستيفاني بقول ، خفت منك من اول مشهد، ويمكن اكرهك مع تتابع الاحداث، بس الاكيد إني بعشق اداءك وبحب شغفك بالفن.
