ممثلاتنا ” ميريل ستريب” ونص.

بقلم جوزفين حبشي

من بعد ما عشقت وانبهرت وتأثرت بأداء رلى حمادة ونوال كامل بمسلسل “خمسة ونص”، ورندة كعدي بمسلسل ” ومشيت” ، وهيام ابو شديد ب”الكاتب” و” خمسة ونص” ، وجوليا قصار ب” انتي مين” و السي فرنيني ب” واشرقت الشمس” وختام اللحام ب “الهيبة” وغيرن من الممثلات الكبيرات قيمة وخبرة وسناً، عبالي اسأل سؤال للمنتجين والمخرجين والكتّاب عنا بلبنان. انتوا اكيد متلنا كلنا بتحبوا كتير تتمثلوا بالغرب، طيب عظيم، ليه ما بتتمثلوا مثلا بهوليوود اللي بتقدّر نجماتها الكبار سنا وقيمة وموهبة مثل ميريل ستريب وسوزان ساراندون ودايان كيتون وغيرن كتار؟؟؟؟ منترجاكم تتأثروا بالغرب، يمكن ساعتها ما بتعود ادوار البطولة عنا حكر على الصبايا اللي ما بدن يتخطوا سن ال ٣٠ وسن الفرفورة القمورة ، حتى لو صاروا اولادن طولن، وحفدتن على الطريق. يا جماعة ويا منتجين وكتّاب ومخرجين تحديدا، قضايا المرأة الناضجة كتيرة كتيييير، والجمهور مش بس عبالو يتابع قصص الفرافير. الحب ما إلو عمر، ويايييي ما احلاه لما المرإة تكون ناضجة وعارفة شو بدّا. المرأة الناضجة هي المرأة المرأة، اللي عجنتها الخبرة وخبزتها الحياة، المرأة اللي بتعرف كيف تحب وتضحّي وتقاوم وتجن، وتثور، وتخاف، وتحفر الصخر بإيديها وتحزن وتنوجع وتفرح وما توقف عند قصص زغيرة ما بيعود الها طعمة لما تختبر الحياة. فيا ريت يا
اعزاءنا المنتجين والكتّاب والمخرجين يا ريت بتنضجوا بدوركن وبتقدمولنا اعمال من بطولة ممثلات فعليات بيتربعوا على عرش الاداء الحقيقي، الصادق، الطبيعي والمقنع. عرش من الصعب يتزحزحوا عنو لأنو هالممثلات اشتغلوا على حالن وما احتاجوا يوم يعملوا “تجميل” لاحساسن و”بوتوكس” لتلقائيتن وعفويتن و”نفخ” لانفعالاتن واداءن، حتى لو البعض منهن ، خافوا من الزمن ومن ” محدودية” المنتجبن والكتّاب والمخرجبن اللي ممكن تقعِدن بالبيت، واضطروا يخضعوا للتجميل الخارجي، اللي جمّدلن اهم شي بتملكو الممثلة: الاحساس الطبيعي. يا ريت بتنكتب الادوار لتجاعيد حفرت عمر مليان خبرة وابداع على وجوه ممثلات قاوموا موجة الاستسهال السائدة، وحبّوا الفن الحقيقي، وما رح يخافوا من هلأ ورايح من تجاعيدن وعمرن .
امنية من القلب، مع الاشارة الى انو بعض الكتّاب عم بيقدموا ادوار اولى لممثلات ” ناضجات”، منذكر على سبيل الذكر لا الحصر ، كلوديا مرشليان بمسلسل ” اسود” ( ورد الخال) و منى طايع اللي سبق وقدمت ادوار بطولة لشخصيات فوق الاربعين والخمسين بمسلسلاتها، وعن جد هالمسلسلات هي بنظر الجميع ناجحة ورائعة متل “فاميليا” و”عشق النساء” و”اشرقت الشمس” وغيرها.
عبالي وكتار متلي عبالن يشوفوا مسلسلات وافلام، الدور الاول والبطولي فيهن لنجمات رائعات ، عم بيأدوا ادوار غير دور الام مع احترامنا وتقديرنا لهالدور الاساسي، لكن بمسلسلاتنا عادة ثانوي . ادوار فيها شغف وجنون وعهر وشرّ وظلم وتعب ووجع وفرح ، ليش لأ؟؟؟؟ ادوار بتكسر الصورة النمطية للمرأة فوق الخمسين وبتفرجينا قدرات ممثلات رائعات ، كلهن قادرين يكونوا “ميريل ستريب” لبنان اذا انعطتهم الفرصة والدور المناسب، متل السي فرنيني ومارسيل مارينا ورلى حمادة ورندة كعدي وهيام ابو شديد ونوال كامل وجوليا قصار وتقلا شمعون وكارمن لبّس وبيتي توتل وختام اللحام ومارينال سركيس ونهلا داوود ورندة الاسمر ووفاء طرابيه وجناح فاخوري وانشالله ما كون نسيت حدا ، مع انو اللي نسيتن ممكن ينبسطوا لأنو رح ينقال هني تحت الخمسين?