منوعات
نمت وحلمت بجورج كلوني…( نص كاريكاتوري خيالي)
جوزيفين حبشي
نمت بعد الغدا، وحلمت إنو انا بافتتاح مهرجان البحر الاحمر السينمائي الدولي بنسخته السادسة . وبصفتي مبرمجة ومحاورة بالمهرجان، ضربت ايدي عالطاولة وقلتلن:” يا بتعزمولي جورج كلوني، يا انا رح قدّم استقالتي”. طبعا فورا بعتولوه دعوة، وهو طبعاً ما صدق يجي، من بعد ما سمع من اصحابو جوني ديب وشارون ستون ومايكل دوغلاس وويل سميث وسبايك لي قديش استمتعوا خلال الدورات السابقة من المهرجان.
حاصلو، وصل كلوني وطبعا انا استقبلته بالاحضان على السجادة الحمرا. وخبّرته قديش كنت مغرومة فيه من زمان وكنت سانّة سناني عليه.
-ابتسم وسألني ليش فقدتي الأمل؟
-ليش قولك؟ من ورا مدام أمل. بعدين عيب ، ما اسما الا بنت بلدي ، ومن لحظة ما صارت هي ” مدام كلوني” ، انت صرت صهري وسندة ضهري. Do you understand شو يعني ” سندة ضهري”؟
-ابتسم وقال: of course, حماتي بارعة بتقلي دايما :يا سندي. So اذا عندك شي سند بدك تدفعيه، او ضهرك عم يوجعك، فيكي تستندي عليي، no problem
-ohhh جرجي ما احلاك، بس انا بدي تسندني بمسلسل ناويي صوره.
– بدك ياني مثّل فيه؟
– كان بودّي يا جرجي، بس انا مسلسلي عن فنانين لبنانيي كبار بالعمر، فزّوا فوق ال٦٥ وال ٧٠ ، وما عاد حدا يشغّلن. وما بتزبط حطك بيناتن. اولا لأنك مش لبناني، وأمل ما فيها تعطيك الجنسية .
-Seriously?
– i swear to god مزبوط. وثانيا صحيح انت فزّيت فوق الستين، بس بعدك شيخ الشباب، وما ممكن حدا من منتجي هوليوود يحطك عالرف او يعطيك شي دور صغير رفع عتب ، متل عنا.
-طيب كيف فيني اسندك؟
-اذا كتير مصرّ، فيك تطلع ضيف شرف بالمسلسل، هيك اطلالة صغيرة. بس الاهم انك تدعمني دعمة كبيرة ماديا. الحكي بسرّك يا جورج، ما حدا بدو ينتجلي هالمسلسل، وانا رح افقع لاعمله لأنه مهضوم كتير ومؤثر كتير و فيه رسائل عديدة عن وضع الفنان بلبنان بهالظروف الصعبة، وكمان فيه دعم للدراما اللبنانية. دخيلك ايدي بزنارك.
-طيب listen
وقبل ما اسمع جورج، بسمع صوت متل انفجار ، وبفز باربعتي من النوم.
-امي بتطمّني: ما تخافي ماما، هيدا جدار الصوت.
-يلعن حظي ويلعن اسرائيل، طار السبونسر.
ومن بعد ما خبرت امي عن الحلم، قالتلي انه هيدا بيعني انو حلمي رح يتحقق ، ورح لاقي منتج بعد إشارة او إشارتين.
-امي، هيدا ما عاد تفسير احلام، صار تبصير بالفنجان
-خلص ما تشارعي، بعد اشارة او اشارتين، رح يوصلك اتصال من جمال سنان او صادق الصباح. قولي انشالله, وقولي أمي قالت.
