ثقافة
بكرا 4 آب. ايمتى 5 آب؟
جوزيفين حبشي
بكرا 4 آب… ب 4 آب 2020، كان في شوب كتير. اكتر من المعتاد يعني، مع انو الشمس كانت عم بتبلش تغيب. يمكن الشمس كانت عم تمهدلنا بهيداك اليوم، لنار من نوع تاني، بس للصراحة انا ما انتبهت. يومها بيّي كان بعدو معنا و…مش معنا، ما بيقدر لا يحكي ولا يمشي، بس معنا. وفجأة، بينخر تقل صمت هيداك النهار، صوت طيران، ووراه صوت عميق رج بقلبنا. صرخت أمي بأعلى صوتا” يا عدرا، شو هيدا؟؟“، جاوبتا أنا وعم اركض لعند بيّي :”طيراااان، الطيران عم يقصف، كيف بدنا ننزّل بيّي لتحت“؟ وما لحّقت نزّل بيّي لتحت، لأنو كانت روح بيروت عم تطلع بهيديك اللحظة لفوق، ونزل القزاز عنا بالحي متل الشتي، مع إنو نحنا بعاد نسبياً عن المرفأ. بهاللحظة راح الدش، وانقطعنا عن العالم، وما عرفنا غير من الدخان الاسود على أحمر وأصفر اللي صبغ سما بيروت، ومن أرسال تلفزيون لبنان المغبّش ، إنو هيدا تفجير. بس تفجير شووو؟ بس تفجير مييين؟ هيك عوّدونا، يحطوا تفجير ليخلصوا من الباش بشير ، من رينيه معوض، من رفيق الحريري، من جبران تويني، من سمير قصير، من مي شدياق، من وسام الحسن، من ومن ومن ومن ، بس يحطوا تفجير ليخلصوا من بيروت؟؟؟؟ من بيروت بيروت كِلا، هيك فرد مرة؟ من الاولاد والامهات والبيّات والازواج والاخوة والخيّات والاحبة والاهل والاصحاب والجيران والبيوت والشجر والدكاكين والمحلات، وقهاوي البحر، والشوارع المعجوقة فينا، والارصفة اللي تمشينا عليها، والصور اللي اخدناها، والاحلام اللي حلمناها والضحكات اللي تركناها أمانة بمحلات الجميزة و الداون تاون، ومطاعم الاشرفية، وسينمات الاسواق وسوفيل والسوديكو والABC ، والذكريات اللي خبيناها وهونيك وبكل مطارح بيروت؟
من 5 سنين، الدنيي انهدت فوق راسنا عالساعة 6 و 7 دقايق. بيروت ما عادت بيروت، ونحنا ما عدنا نحنا. سمعنا صوت طيران، كذّبونا وقالوا لأ. وعدونا إنو الحقيقة رح تبيّن بعد كم يوم. كذبوا علينا وبعدن ورح يضلّوا يكذبوا علينا وعلى حالن .
من 5 سنين، طمرونا تحت ردم 4 آب. مزبوط ، حياتنا كمّلت، وبعدنا عم نخلق ونكبر وندرس ونشتغل ونحب ونتجوّز ونجيب ولاد، ونسهر ونضهر ونضحك ونحلم ، ونسخر من كل شي حولنا، ونردد بابتسامة وغصة ” نحنا تمسحنا” . لأ ، نحنا مش تماسيح ولا طائر فينيق . كل واحد منا، من جوّات جواته، بعدو علقان تحت ردم هيداك النهار.
لحياتنا عن جدّ تكمّل بعد 4 آب، لازم يكون في 5 آب، لازم يكون في بكرا … ويا خوفي نضلّ نغني :موعدنا بكرا، وشو تأخر بكرا، قولك مش جايي حبيبي؟
