منوعات
مورغان اورتاغوس، ٣ بواحد: أم كلثوم، سميرة توفيق واليسا
جوزيفين حبشي
خبير التجميل اللبناني بسام فتوح قاعد بال Beauty Lounge عندو، عم يشرب نسكافيه وراخيها… وفجأة بيدق التلفون
بسام بيفنجر عيونو الزرق الحلوين وبيستغرب الرقم…”مورغان أورتاغوس؟! يا دلّي، شو بدّا فيي؟؟؟؟ معقول تكون ملخبطة بيني وبين بسام مولوي وزير الداخلية والبلديات بحكومة نجيب ميقاتي “؟؟؟؟؟
بيرد هو ومتردد:” الو!!؟”
مورغان بصوتا الدلوع الغنوج : هيللو بسام! How are you دارلينغ؟ انا مورغان اورتاغوس
بسام بيفز من كرستو: مورغان ، مورغان ما غيرا؟؟؟؟
مورغان: yes yes , The MORGAN.
في مجال يا دارلينغ ، تحجزلي موعد سريع ل makeup يوم الأحد!
بسام وضحكتو شبر : اوف كورس حبيبتي، بس الاحد منكون مسكرين. Weekend يا مورغان.
مورغان: pleaaaase darling. لازم كون بكامل أناقتي، رح كون ببيروت وموعدي كتير حساس… بدي ماكياج FULL GLAM!
بسام: طيب خلص ، تكرم عينك، بعطيكي موعد عالصبح، بترتاحي وبتخلصي بكير…
مورغان : ممم… no ، انا بشوف انو afternoon أفضل. أول شي ضروري أمرق لعند إيلي صعب اختار فستان، بعدين بكمّل عند طوني المندلق لضربة براشينغ، هيك عالماشي عالسريع، وبعدين بجي لعندك. Deal ؟؟؟؟
بسام : طيب ok، بعد الظهر. شو الستايل؟
مورغان (بحماسة): بدي نفس اللوك اللي عملتو لإليسا بآخر كليب! Wowww رهيب! Amazing عن جد… لأنو , as you know, رح التقي بالثنائي الشيعي، وبدي فوت عليهن بقوة!
بسام : حلوة منك، وهيك جماعة المقاومة ما بيعود فيهن يقاوموا سحرك. بس ما تكوني ناويي تغنيلن!
مورغان : طبعا ناويي غنيلن نفس الاسطوانة اللي بغنيها كل مرّة ، بما انو هني مصرّين يضلوا يغنّوا على ليلاهم.
بسام: شو رح تسمعيهن يعني؟
مورغان تتنحنح: “انا مش صوتكن لتسكتوني، ولا نسر بجانح مكسوووور”
بسام: وبركي سكتوكي بالقوة؟ بالنهاية انتي ست كيوت وحلوة وكلك انوثة؟
مورغان: what what what؟؟؟؟ اهو دا اللي مش ممكن أبدا
بسام: هون انتقلتي من اليسا لأم كلثوم
مورغان: it’s ok، ومستعدة صير سميرة توفيق اذا ولا البد
بسام مصدوم؛ سميرة توفيق؟؟؟ شو عرّفك بسميرة توفيق؟
مورغان: of course بعرفا. مش هيي اللي بتغني: “انا حلوة وعارفة حالي، انا أقوى من الليالي”.
بسام: امبلى
مورغان: great , و”يا ما قبلكن ناس حبّوا يجربوا، شربوا مرّ الكاس، ولسّه بيشربوا”. لهيك يا دارلينغ يا بسام، يا ريت ما تنسى بعد ما تعملي ماكياج اليسا، تحطلي a small mole on my cheek . شو؟ deal؟
بسام: deal, بس اوعا انتي تنسي تحطي بجزدانك a big check، لأنو رح اعمل مجهود ثلاثي : اليسا وام كلثوم وسميرة توفيق، وهيك اكيد بتستقوي عالثنائي، ما انتي ٣ بواحد.
مورغان بفرح: yesssssss
