منوعات
نمت وحلمت بوائل كفوري وهيفا وهبي
جوزيفين حبشي
( نص كاريكاتوري خيالي)
نمت وحلمت اني واقفة عالفرندة البحرية وقت العصرية. وإذ بلمح وائل كفوري واقف عمفرق بيتو . لا حكاني ولا حكيتو لأني بصراحة ما عرفتو. شو ضعفان حسيتو. ندهتلو وسألتو :
-خير يا وائل؟ اوزمبيك؟ منجارو؟ ويغوفي؟
-لا والله، بس مغروم ، وانا عالغرام لا بعود باكل لا سكر ولا مربى.
-طيب شو رأيك بفنحان قهوة؟ يلا ميّلك ميّولة ، واذا عبالك اكيد بعملك تبولة.
وما لحق وفات وائل حتى دق الباب. بفتح، بتطلع هيفا وهبي جايي تعاتبني :
-لاااااا بدّنا نروق يا ست زوزو ، وانا هيفا انا، مين غيري انا بيحقله يقول شو ما بدّو، حتى لو كامة “تفه”؟
-لااااا بدنا نروق، صايرة كتير طنبوزة، وما حدا في يحكي معك كلمة. اسطفلي، قولي شو ما بدّك ، وشو المطلوب هلأ؟ اعتذار رسمي عصنوبر فيسبوك وانستا؟
وقبل ما تفتح تما لتجاوب، بتلمح وائل و… “تفه” ملو تمّا.
-ولوّ يا هيفا، عم بتقولي تفه عَ وائل؟؟؟؟
-اكيد لأ، تفه عالضعف . خلص بلاها ” تفه”، رح قول نياااء، مش لابقلو الضعف ابدا. كان احلى ولوووو .
– يا هيفا، حرام وائل، جرحتيلو كبرياءو وكسرتي بخاطرو.
-يا الله، sorry , خلص شو ممكن اعمل لراضيه؟ ببوس الواوا؟
-ممكن
-لأ، بلاها هيدي “ممكن”، مش طايقة هالفترة MK.
– شو خص ممكن بال MK؟ اصلا ما حدا طايقها وطايق صوتا وعنينا ليل نهار.
-عم بحكي عن مروان خوري، MK
– آآآه، مزبوط MK . شو مش لابقلو هالاسم . بس ليش مش طايقة مروان خوري؟ ولوّ؟؟؟؟
-لأنو قدّم ل NNN أغنية مسلسل ” ممكن”. انا من شو بشكي؟؟؟؟ اذا هي ملكة جمال لبنان، وعندا لقب بيثبت هالشي، انا MJK يعني ملكة جمال الكون، وعندي اغنية بتثبت هالشي.
-خلص روقي، وفوتي لنشرب قهوة. عيب تاركين وائل وحده . وبتعرفي شو؟ أنا مستعدّة اكتبلكن انتي ووائل اغنية ديو. اذا هو مروان ابن الخوري، انا جوزيفين بنت الحبشي. شو قلتي؟
-شو بتقول الاغنية؟
-بيبلش وائل وبيغنيلك:
فيكي جمال غريب
بيخلي الجرح يطيب
الدنيي ماجابت بعد
متلِك ولا رح بتجيب
بدي غيّر فيكي العالم
علمهن كيف كيف بيحبوا
والكتبوا تاريخ الحب
نسيهن كل كل شي كتبوا
بدي غيّر فيكي العالم
وهون انتي بتجاوبيه:
عاشقاك أنا بجنون
ومعاك حبيبي بكون
ملكة جمال ملكة جمال
ملكة جمال العالم
ملكة جمال الكون
