فن ومشاهير
نمت وحلمت… لبنان بالمونديال ( نص كاريكاتوري خيالي)
جوزيفين حبشي
نمت وحلمت انو لبنان مشارك ببطولة العالم لكرة القدم… ومباراة الافتتاح ضد ايران!!!!
مين رح يفتتح المونديال اللبناني؟ صحيح شاكيرا وسلمى حايك اصلن لبناني، وصحيح ميريام معتبرة حالا عالمية و” توكو تاكا” عالآخر، بس بوجود فيروزتنا، “كله بينضبّ”.
وبتدخل الملكة على الملعب ومعها ماغي بو غصن . ماغي حاملة الكاس بإيد والميكروفون بإيد ، وقالت بأعلى صوتا :” ممنون قلبي للدني ممنون، لأنها أعطت لبنان فرصة المشاركة بأهم حدث رياضي عالمي” .
وهون بتعطى ماغي الميكروفون لسفيرتنا الى نجوم. فجأة بيحلّ الصمت على المدرجات، وكبّ الابرة بتسمع رنّتها، وبيغرّد صوت فيروز:” لبيروت من قلبي سلام لبيروت”… يا سلاااام على هالكلمة وعلى هالأغنية . ملعوبة صح ومختارة بذكا نفسي، هدفها تأثّر عالفريق الخصم ، وتحسس فريقنا انه نحنا بلد منستاهل السلام والفوز.
واشتعلت المدرجات بالتصفيق ، ودخل منتخبنا على أرض الملعب وسط ذهول العالم. صحيح ما حدا فاهم كيف تأهل، بس في معلّق قال: الهيئة قطعوا التصفيات بالتوافق الوطني”. وكانت التشكيلة أغرب من الحلم نفسه…مين بتقولوا تم اختياره للمشاركة بأول مباراة ضد ايران؟
ندين نسيب نجيم ” ممكن” تشارك؟ لأ، مش فاضية هلأ، بيكفيها معاركها مع مازن الواطي. اصلا هي سبق وسجّلت غول بقلب ظافر العابدين، ووقعتو بشباك الهوى.
مين؟ سيرين عبد النور؟ لأ ، الإعلان عن مشاركتها مجرّد ” كذبة سودا”.
نعيم قاسم؟ لأ ما حزرتوا. رفض رفضا قاطعا يشارك ضمن تشكيلة فريق لبنان. إنو مش بس مستحيل يلعب ضد ولايه الفقيه، كمان مستحيل يلعب مع الشيطان الاصغر اسرائيل. صحيح ايران عم تلعب وتفاوض مع الشيطان الاكبر اميركا، بس فرفور ذنبه مغفور. وما حدا يجرّب يقنعه لنعيم، الزلمي صاحب مبدأ و… شو حلوين اصحاب المبادئ بالحياة.
نبيه بري؟ كمان لأ، متل ما خلصت ايام الساحر مارادونا لما سجّل هدف بايده ( هدف الهي) ، كمان خلصت أيام الارانب اللي كان يطلعها الساحر النبيه من طربوش جده المعلق بطهران.
وليد جنبلاط؟ هنّي عزموه، بس لمّا سألهم ” الى أين؟ المكسيك أم كندا أم الولايات المتحدة؟ داخوا وخافوا يدوّخهم اكتر فقالوا بلاها.
سمير جعجع، اكيد اكيد اكيد مشارك، وبخط الهجوم ، ومراهن يحط 3 points . عفوا حكيم، بس هيدا ماتش فوتبول ، مش باسكتبول. بس الحكيم الالماني مآمن انو التاريخ يعيد نفسه وإنو نتيجة 1-7 طبعا طبعا طبعا رح تتكرر. مع إني برازيلية، بس انشالله يا حكيم.
هيفا وهبي؟ مزبووط مشاركة ونازلة بكل تقلا ( مع انها مش تقيلة ابدا، لا بالوزن ولا بالدم) . هيفا تتقدم، هيفا بتفوت between بين لاعبين ، ما بتمرر pass لمروان خوري اللي ” ناطر” الطابة، وعم بيغنيلا ” لا تكوني هالدنيي واحلاما، بتوعدنا وياما بتطلع كذابة”. هيفا بعدا منطلقة متل الصاروخ ، بس وقبل ما توصل قدام الشباك، بيحاول اللاعب مسعود شكشكيان يشك قداما، ليفركشها ويسرق منها الكرة، بس على مين؟ لاااا… بدنا نروق، انا هيفا انا، مين غيري انا قادر يحط غول؟و ” تفه” على حكم المباراة ، لغي الغول واعتبر هيفا بحالة تسلل offside .
المعلّق الرياضي بيصرخ: “يا جماعة مرّروا الكرة”، بيجاوبه الجماعة: “بعدنا عم نتفاوض على آلية التمرير.”
هيفا وهبي ما بتستسلم، و”إجلد” بترجع تسجّل غوووول وبتحتفل مع الفريق على ايقاع اغنيتا”اغووووول اهواك تتكابر”. بس يا فرحة ما تمّت : بالدقيقة 89 من المباراة، وقبل دقيقة وحدة من نهاية الوقت الاصلي، بيسجل الفريق الخصم هدف التعادل.
لاااااا…. الفريق اللبناني مصدوم… الشعب اللبناني شبه منهار … وفجأة بتوقف اليسا من مقاعد الVIP، ورغم كسر باجرا الشمال, بتشلح سكربينتها، بتلبس الاسبادري، وبتفز متل wonder woman على الملعب و“لما الدنيا تبوظ…عمري ما بزعل ولا بضرب بوز…بضرب الطابة وبحط غول الفوز” و… غوووووول واللي مش عاجبه it’s ok , يضرب راسه بالعارضة.
دونالد ترامب ما شاف هدف اليسا، كان مشغول عم ياخد سلفي مع جورجيا ميلوني بعد ما ترجّته وعلى شوي كانت رح تركع على قدميّه . عصّب ترامب وضاق خلقه وطالب باعادة المباراة أو بيسكّر مضيق هرمز. بيوشوشه جيه دي فانس ” نحنا الربحانين، ما في داعي نعيد المباراة”.
نبيه بري، بيضرب بمطرقته على راس حدا من المشجعين قدامه بالمدرجات ، وبيوقف هو وحامل دفتر صغير مكتوب عليه “محاضر الجلسات التكتيكية”، وبيقول بأعلى صوته:”خلّونا نرجع لمبدأ التوافق الرياضي… ما في هدف إلا بالتشاور”. بيجاوبه ميشال عون:” خلّونا؟؟؟ لأ ما خلّونا”.و… بيصفّر الحكم صافرة النهاية وهون المشهد السريالي بالمدرجات: الكل مبسوطين الكل منتصرين.
