منوعات
نمت وحلمت … بأصغر فرهادي (سيناريو كاريكاتوري خيالي)
جوزيفين حبشي
من بعد ما سمعت عن العقوبات الاميركية الجديدة بحق ٤ اشاوس من مجلس نوابنا ، بنام عَ وجي طب وبحلم بالمخرج الايراني أصغر فرهادي وعشرة حدعش طنعش، دقت الساعة بالليل وانا وحدي . فجأة دق الباب ….يييي…. شو بدّو مني هالايراني؟
هيك قلت لاول وهلة لما شفته من عين الباب ، لأنو كما تعلمون، أنا ضد ايران وفي a seperation كاملة بيني وبين المحور الايراني بلبنان. بس فورا رجعت تذكرت اني ضد ايران بالسياسة، بس مش بالسينما، لهيك فتحتلو الباب وسألتو باستغراب:
-خوش آمدید مسيو اصغر، بس شو عم تعمل هون؟ انت مش بمهرجان كان عم بتقدم فيلم Parallel Tales؟
-كنت بكان، وكان لازم ابقى، بس اول ما سمعت بالعقوبات على النواب اللبنانيين ، قلت لازم اتحرك.
-خير؟ شو ناوي تعمل يعني؟
-مش رح شن حرب. بدي اعمل فيلم عن الحزب والمقاتلين لبيّضلن صورتن بالعالم
– بس عفوا منك، انت سبق واخدت اوسكارين بهوليوود. يعني معقول تنزع علاقتك باميركا كرمال تدافع عن شباب الحزب وتهاجم اسرائيل؟ اذا عملت هالفيلم، ما بقى تحلم بالاوسكار.
-مش مهم، بيضل عندي مهرجان كان، والرئيس ماكرون حنون مع ايران، مش متل المجنون ترامب .
-طيب شو السيناريو اللي عم بتفكر فيه؟
-حابب اعمل فيلم انيمايشن، لرد الاعتبار لمقاتلي الحزب ، بعد فيديو LBC المسيء.
-بدك للصراحة يا اصغر؟ ما فهمت ليش زعلوا جماعة الحزب؟ انو شبهوهن بالعصافير. في احلى من العصافير؟
-يا تسلميلي ، العصفور مخلوق ضعيف صغير ، حساس ، والمقاتلين قبضايات وعتاعيت. الاختيار ما كان موفّق ابدا. انا عم فكّر اعمل فيلم من وحي The Lion King وحوّل شباب الحزب لأسود. شو رأيك؟
-ما بنصحك. ممكن يتشاءموا الشباب ويفكروك عم بتفوّل علين. الاسد ما عاد عالموضة ولا بالسلطة. صار بروسيا.
-طيب شو رأيِك أعملهن “نمورة”.
-نمورة جمع نمر؟
-ايه… شو رأيك؟
-ما بنصحك. ممكن يزعلوا شباب الحزب ويعملولنا هالمرّة ٢٢ ايار. بسلامة فهمك يا اصغر، نحنا بلبنان عنا حزب ” نمور الاحرار” وهو كمان متل القوات اللبنانية والكتائب، معارض شرس لنمورتك. مع انو كنت عم فكرلك بكاست بيزبط كتير مع concept النمر. كل واحد منهم نمرة اكتر من التاني. ممثلين عن جد، لمزيد من المصداقية، متل الثنائي حداد. ممثلين غير شكل وبيستاهلوا العالمية.
-حلوة فكرة الثنائي الشيعي.
-لأ، هني مش شيعة
-no problrm , حلوة فكرة الاخوين حداد.اخوة بالدم وبالمصير
-لأ، هني مش اخوين متل الاخوين رحباني يعني، بس انو في عندن نفس الجينات. وطنية عالحِل. وبتعرف شو؟ فيك كمان تعطي دور قائد العمليات والمخططات الاستراتيجية للمعارك والهجوم والدفاع لغسان سركيس. هيك بتضمن انو النصر صار بالسلة. وعَ فكرة ، هني كتير مشهورين. Everybody Knows هالشخصيات الوطنية. هيك بتضمن تبيع عَ اسمن.
– شو بخصوص البطلات؟ حلو يكون معنا مراسلات عم بيغطوا ويحللوا المعارك، وقصص حب ورومنسية بين المقاتلين والصبايا اللي ناطرينن ليحتفلوا سوا بالنصر.
-يوجد. ما تعتل همّ ابدا، كتاااار اسمالله، جيش بكل معنى الكلمة ، من راشيل ورندلى وغدي وجرّ ، وكلن شي بيرفع الراس. بكرا بدعيلك ياهن لجلسة كاستينغ. انشالله يقدروا يفضّوا حالن شوي لأنو كتير مضغوطين بمقابلات عالتلفزيونات والسوشل ميديا.
-بيضل بدنا شي مطربة تغنيلنا اغنية الفيلم، متل اغنية سيلين ديون بفيلم Titanic.
-يوجد.جوليا بطرس
-عم جد ممنون ومتشکرم عالمساعدة. يلا انا راجع عَ كان. و …”خواب شيرين بِبيني”. واذا ما فهمتيها، اسألي Chat GPT
-للصراحة ما فهمت غير شيرين. بس مين قصدك؟ شيرين عبد الوهاب؟ شيرين مش فاضيتلنا هلأ، عم بتنزّل اغاني البوما الجديد تباعا تباعا. خليك عَ جوليا ، واكيد رح بتراعيك بالسعر ، كرمال القضية ورسالة الفيلم الوطنية يعني.
