منوعات
نمت وحلمت ب… ماغي بو غصن ( سيناريو كاريكاتوري خيالي)
جوزيفين حبشي
قبل ما نام، شفت فيديو عودة الممثل اللبناني وجيه صقر الى ربوع الوطن بعد ما كان اتحفنا بفيديو سابق انو ناوي يهاجر على طول، ولن يعود قبل ما يظبط الوضع.
شفت الفيديو، نمت على وجي طَب وحلمت…. بماغي بو غصن. يييي… شو جابا عليي بهالليل؟ سألتا باستغراب:
-خير؟ انتي مش بالكويت وعندك مسرحية “منتزه الخيران”؟
-ردّت بنبرة جدّية جدا جدا :” مزبوط، بس كان ضروري ارجع فورا ، لأنو الصقر رجع، وصراحة ما بعرف شو المسرحية اللي ناوي يلعبا”.
Screenshot
-انا باستغراب:” مسرحية شو؟؟؟ ما عندو مسرح، عندو تيك توك . بعدين اكيد انتي غلطانة يا ماغي. الصقر هجر ست الدنيا وراح يعيش بأم الدنيا على طول، هيك هو قال”.
-ماغي بسخرية: “لازم تخلّي بالك من السوشل ميديا يا زوزو. الصقر رجع ونشر فيديو من المطار. وبرجع بقلّك ما بعرف شو المسرحية اللي ناوي يلعبا، بس بخاف يرجع يغيّر رأيه ويفل، والبلد ما بقى يحمل خضّات تقيلة من هالنوع. لهيك قلت لحالي قومي يا بنت احملي حالك وتعي شوفي شو الموضوع”.
-“حبيبتي ماغي، طمني بالك وارجعي كمّلي مسرحيتك اللي مكسّرة الارض، وما تخافي على لبنان يتكسّر بفعل المظاهرات والاحتجاجات وتوليع الدواليب وقطع الطرقات بحال قرر الصقر يرجع يطير عن جديد. وحياتك ما في شي منّو. اكيد انتي عم تحلمي متلي. شو تعشّيتي قبل ما تنامي تخمين؟ اكيد كبسة كويتية، لهيك قررتي تعمليلي كبسة عالحلم. صدقيني الصقر هاجر، وهو قال بعضمة لسانه إنو مش راجع قبل ما يصير لبنان “مثالي” على قياسه، ونضيف ومنظم وآمن، والإشارات الحمراء محترمة، وما حدا بيكب زبالة عالطريق. حلو كتير، بس ليش ليرجع والوضع بعدو على ما هو عليه من وقت ما ترك اوتيل البلد؟ نعم نعم، لبنان بالنسبة للصقر اوتيل ، بيتركه اذا الخدمة مش سريعة، والموظفين بيتأخروا دايما بتلميع اللوبي قبل وصوله.
Screenshot
-ماغي بابتسامة ثقة: “امبلى رجع، وشكلو متفاءل وبيحب الرئيس وكرماله وكرمال البلد رح يعطينا فرصة تانية. ولهيك انا رجعت. قلت لحالي روحي يا بنت حلّي هالموضوع الخطير متل ما الك بالعادة تعملي بمسلسلاتك. وصراحة خفت يرجع يتشاءم طالما الخدمة بأوتيل البلد بعدا مش مثالية ١٠٠٪ متل ما كان طالب. لهيك اتصلت فوراً باوتيل الافندي، وحكيت جو بو عيد بلوبي الغرام وقلتلو يحجزله سويت للصقر. ووصّيت صديقتي وحبيبة قلبي جيسي عبدو تهتم فيه حتى ما يزعل ويرجع يفل ويسبب أزمة جديدة بالبلد. كمان طلبت من شمس الدراما، حبيبة قلبي باميلا الكيك تقعد معه وتوعّيه وتحكيه شوية فلسفة وطنية. انو فيها تقلّو “طوّل بالك على اللي عم بيكبوا زبالة عالطريق، معليش من زمان كنا ننقي العدس من الحجار ، هلأ صرنا ننقي الحجار من العدس . فكّر للحظة، طلاع من الوقت ، طلاع برات الوقت، طلاع برّات الصفحة كلا. طلاع برا الغلط، لتشتاق ترجع تفوت لجوّا صح”.
Screenshot
-أنا بانبهار: ” يا سلام يا ماغي. عن جدّ برافو عليكي، ما في حدا ممكن يطلع راس مع الصقر الا ال Eagle.
-ماغي بسعادة: “اكيد خطتي رح تنجح، والصقر رح يبقى بربوع الوطن وما رح يعرّض الوضع لانتكاسة تانية، والشعب لاكتئاب جديد. بكفّينا مصايب ولووووو. يلا بخاطرك، انا راجعة على الكويت لكمّل المسرحية. وبتعرفي شو ناويي اعمل؟ بأول اغنية لبنانية بقدّمها عالمسرح، بيكون عم يمرق عالشاشة صور للبنان وبيروت وبعلبك والارز وصيدا، وعظماء الفنانين عنا متل فيروز وصباح ووديع الصافي. عم فكّر ضيف صورة الصقر وغنيله :” اهلا بهالطلة اهلا” بالاذن من وزارة السياحة طبعا. شو رأيك؟
-روعة. يلا bon voyage ، بس مش على طريقة كارما، وتبقى طلّي عليي بهالمنامات والاحلام، منتسلى، شو عنّا؟
