الهيبة٣: حصادها شغف ومواجهة بين جبل وقمة افريست

هل فقدت الهيبة هيبتها بالجزء الثالث؟؟؟
لأ، واكيد بتبقى هيبة ” الهيبة” محفوظة ومصانة، حتى لو تخللها بعض الضعف. ونقاط الضعف بهالجزء طبعا موجودة، ولكن في قصص كتير بتشفع.
” الهيبة”( للمخرج سامر برقاوي، عن قصة سيناريو وحوار هوزان عكو و باسم السلكا) تميّز من اول ما انطلق، بالمصداقية والواقعية بمعالجة واقع موجود(وافقنا او لم نوافق، تحفظنا على الصورة المثال اللي عم بيقدمها جبل للشباب، او لم نتحفظ، اختلفنا حول كونه مجرم او شهم ومثال يحتذى به، او لم نختلف) .
ايضا لفت ومن الاول، بايقاعو السريع والمليان بالتشويق والاكشن ، وسحرنا بشخصيات نافرة وكاريزماتيكية صارت “قمم” و”جبال” بالاداء، متل جبل( تيم حسن) وام جبل( منى واصف) وشاهين ( عبدو شاهين) وصخر( اويس مخللاتي) وغيرن، وبهرنا بأغنية الشارة بصوت ناصيف زيتون.

بس الثالثة ما كانت ثابتة على بعض مميّزات السلسلة، مش كلها. مثلا، التشويق والايقاع السريع تراجعوا بقوة، مع بداية بطيئة وخالية تقريبا من الحركة والمفاجآت اللي معودتنا عليهن السلسلة. القصة ما عادت مقنعة ولا كتير منطقية متل قبل، وكأنها فستان صار ضيق على الجسم، واخدناه عند الخياطة حتى توسعو وتزدلو شقفة قماش من هون وبطانة من هونيك. يعني مركّب تركيب.
هيدا من دون ما ننسى اعادة شاهين للحياة “بتفنغة” خيالية وغير مقنعة (الجزء الاول انتهى بعد موت شاهين بشهور، وانجاب عليا، وبقاء ريما حد صخر). هالعودة ، عاطفيا مرقنالن ياها، لأنو شخصية شاهين محبوبة، والكل كان عبالو يرجع.اما عليا ( نادين نسيب نجيم) اللي ما الهيئة عبالها ترجع، فكان مطلوب ايجاد حل لاكمال المسلسل الناجح بجزء تاني. وهيك صار ، وكان الحل الرائع والمتقن واللي بعتبرو سابقة بعالمنا العربي، العودة لفترة البداية، اي ما قبل احداث الجزء الاول وما قبل عليا، رغم وجود ثغرة مهمة، هي تغييب غادة( كارلا بطرس) عن الجزء ٢ اللي بينتهي باتصال عليا، وبالجزء الاول بيقدمولنا غادة على انها عشيقة جبل من سنين طويلة. طيب، رجعة شاهين مرقناها بالجزء ٣، بس انو يطلع الباقي كلو حلم؟ من انجاب عليا، وريما اللي بقيت مع صخر رغم موت خيا، هيدا كلو طلع حلم؟ نعم حلم وضعف حتى لو ممكن تبريرو بشو ما كان لأنوshow must go on …

ولكن، دايما في “ولكن” ودايما في نقاط ايجابية، والجزء الثالث فيه عدة نقاط قوة. اولا ، هالجزء المتجدد بخروج الاحداث بجزء كبير منها من الهيبة لبيروت، عم بيقدملنا جبل بصورة متجددة ايضا ومختلفة “شوي” عن الماضي. جبل العاشق المتيّم اللي ممكن يخاطر كرمال الحب والحبيبة. صحيح انو في كتير ممكن يعتبرو تصرفو غير مناسب للشخصية اللي انرسمتلو من البداية، خصوصا انو سبق وضحى بالحب لأنو مجبور ، ولكن حلو نصدق انو الشغف ممكن يغيّرنا، يجننا، يطلعنا من حالنا. الشغف كل شي ما عدا منطق، لهيك انا بلاقي قصة حب جبل ونور رحمة نقطة قوة بالمسلسل. الجزء الثالث قوي كتير بحضور نجوم كبار، اداءاتن بعدد من المشاهد تعتبر مدرسة بحد ذاتها، منى واصف الجبارة، عبدو شاهين الرائع، ختام اللحام المذهلة بالمشهد على قبر ابنها وخصوصا خصوصا، جوزف بو نصار، شرير الجزء الثالث، وصاحب الاداء المخيف بكل ما للكلمة والنظرة والابتسامة والصمت من الف معنى ومعنى. ما حدا متل جوزف بو نصار قادر ،بشخصية مركّبة، و بنظرة “فريزريّة” (من freezer ) وابتسامة بتنقط لؤم وبتشرّ “شرّ ” ومن دون ما يفتح تمو
ب ولا كلمة، انو يجمد الدم بعروقنا. ثروت تواجه مع جبل ، واثبت قدامو وقدام كل المشاهدين، انو اذا تيم حسن هو جبل، فجوزف بو نصار هو قمة ايفرست بالاداء.
الهيبة الحصاد، من انتاج صادق الصباح اللي منتمنى عليه بحال حابب يكفي يحصد النجاح مع اجزاء جديدة، انو يركّز على بذار قوية ، نصا وحبكة واداء.